Azərbaycanda milli parklara 2025-ci ilin 6 ayı ərzində 87 542 turist səfər edib.
"Report" xəbər verir ki, bunu Ekologiya və Təbii Sərvətlər Nazirliyinin mətbuat katibi İradə İbrahimova bildirib.
Onun sözlərinə görə, bu göstərici ötən ilin eyni dövrü ilə müqayisədə 12 faiz çoxdur:
“Milli parklara səfər edən ziyarətçilərin böyük əksəriyyətini yerli turistlər təşkil edib ki, bu da ölkə əhalisinin təbiət ərazilərinə, ekoturizmə marağının artması və aparılan ekoloji maarifləndirmə işlərinin nəticəsidir”.
İ.İbrahimova onu da qeyd edib ki, bu ilin 6 ayı ərzində turistlərin ən çox üz tutduğu məkanlar arasında Göygöl, Şahdağ və Abşeron milli parkları ilk sıralarda yer alıb.
Mövzu ilə fikirlərini bölüşən turizm eksperti Cabir Dövlətzadə “Sherg.az”a bildirib ki, 2025-ci ilin son altı ayına dair təqdim olunan statistik göstəricilərdə 12%-lik artım müşahidə olunub:
“Bu artımın əsas səbəbi yaz mövsümünün başlanması və yay aylarının gəlişi ilə əlaqəlidir. Belə bir dinamika, əvvəlki illərin tendensiyalarına uyğun olaraq normal sayılır. Qeyd olunmalıdır ki, xarici turistlərin Azərbaycanı ziyarətləri zamanı yalnız Bakı şəhəri ilə kifayətlənməməsi, regionların tarixi, mədəni və təbii turizm obyektlərinə, xüsusilə də milli parklara maraq göstərməsi müşahidə edilir. Milli parklar ölkənin ekosisteminin qorunması, bioloji müxtəlifliyin saxlanılması və təbii irsin təbliği baxımından mühüm əhəmiyyət kəsb edir. Bundan əlavə, bu əraziləri ziyarət edən xarici vətəndaşlar geri qayıtdıqdan sonra Azərbaycan təbiətinin təbliğində könüllü informasiya daşıyıcıları rolunu oynayırlar. Bu isə öz növbəsində, növbəti illərdə ölkəyə gələn turist axınının artmasına müsbət təsir göstərir. Ümid edirik ki, bu artım payızın sonuna qədər davam edəcək və həmin yüksəlmə daha da artacaq”.
