Paytaxtın Suraxanı rayonunda azyaşlını girov götürüb, öldürəcəyi ilə hədələyən şəxs zərərsizləşdirilib.
DİN-in Mətbuat Xidmətindən “Qafqazinfo”ya bildirilib ki, axtarışda olan, əvvəllər hərbi və digər cinayət əməllərinə görə məhkum olunmuş X.Əhmədov saxlanılarkən polis əməkdaşlarının qanuni tələblərinə qəsdən tabe olmayıb, müqavimət göstərib, uşaq girov götürərək boğaz nahiyəsinə soyuq silah dayayaraq onun həyatına təhlükə yaratmaqla qeyri-adekvat hərəkətlərini davam etdirib.
Ona dəfələrlə xəbərdarlıq edilməsinə baxmayaraq, sonuncu buna məhəl qoymadığından ətrafda olan şəxslərin və azyaşlının təhlükəsizliyi nəzərə alınaraq, X.Əhmədova polis əməkdaşları tərəfindən xidməti silah tətbiq edilərək zərərsizləşdirilib.
Faktla bağlı araşdırma aparılır.
Təhlükəsizlik məsələləri üzrə ekspert Rəşad Rza "Sherg.az"a bildirib ki, uşağın bu işin içərisində yer alması narazılıqlara səbəb olub:
“Bu xalq və əhali arasında təşviq yaratdı. Lakin polis əməkdaşlarımızın səyləri nəticəsində cinayətkar zərərsizləşdirildi. Ümumiyyətlə girov olduqda cinayətkarla psixoloji danışıqlar aparılaraq onun nəticəsində zərərsizləşdirilməlidir. Çünki bu cür cinayətkarlar götürdüyü girovlara zərər verə bilər. Dünya təcrübəsində də belə hallar zamanı psixoloji danışıqlar aparılaraq cinayətkara təsir göstərilir. Məhkum olan şəxslər isə nəzarət altında saxlanılır. Ancaq ölkədə məhkumların sayı həddən çox olduğuna görə tam nəzarətdə saxlamaq mümkün deyil. Bu mexanizm tənzimlənməlidir. Yəni hər bir məhkum azadlığa buraxıldıqdan sonra müəyyən müddət nəzarət altında olmalıdır”.
