Xaçmazda yanğın zamanı xəsarət alan kişi ölüb.
"Report"a xəbər verir ki, ötən gün Susayqışlaq kənd sakini, 1969-cu il təvəllüdlü Əvəz Vəlizadə yaşadığı evdə yataq otağında uzanarkən çəkdiyi siqaret kötüklərini yerə atması səbəbindən yanğın baş verib.
Yanğın zamanı yanıq xəsarətləri alan kişi xəstəxanaya yerləşdirilsə də, orada ölüb.
Faktla bağlı araşdırma aparılır.
Əməyin mühafizəsi və texniki təhlükəsizlik məsələləri üzrə ekspert Orxan Musayev "Sherg.az"a bildirib ki, siqaretçəkmə zamanı yanğın təhlükəsizliyi qaydalarının nəzərə alınmaması bir çox faciəvi bədbəxt hadisələrə səbəb ola bilər:
“Qapalı məkanlarda, o cümlədən mənzil və binaların bloklarında siqaretdən istifadə yolverilməzdir. Qapalı məkanlarda siqaretin çəkilməsi yanğın hadisələri ilə yanaşı, qaz sızması nəticəsində partlayış hallarının da baş verməsini qaçılmaz edir. Ümumiyyətlə mənzillərdə siqaret çəkilməsi zamanı qığılcımın yanğına qarşı həssas olan, mebel, paltlarla təmas etməsi yanğının başlamasına təkan verə bilər. Bəzi hallarda siqaret çəkildikdən sonra natamam söndürülür və zibil qutusunda alışma baş verir. Bu səbəblə də obyektlərdə və iş yerlərində siqaretin çəkilməsi üçün xüsusi yerlər təyin olunmalı və nişanla işarələnməlidir. Həmçinin siqaret çəkilən yerlərdə su və odsöndürən balon mövcud olmalıdır. Bütün hallarda yanğın hadisələrinin baş verməməsi üçün daha da diqqətli olunmalı, yanğın təhlükəsizliyi qaydalarının tələblərinə əməl edilməlidir”.
