Rusiya Hərbi Dəniz Qüvvələrinin yeganə aviadaşıyıcısı olan “Admiral Kuznetsov” gəmisinin taleyi hələ də qeyri-müəyyən olaraq qalır. Rusiya rəsmiləri gəminin artıq təmir olunmayacağını açıqlayıb. Bu qərar, Rusiya donanmasının nüfuz itkisi və Qara dənizdəki zəifləyən gücünün simvolu kimi qiymətləndirilir.
Sherg.az xəbər verir ki, 1985-ci ildə istifadəyə verilmiş “Admiral Kuznetsov” gəmisi 2017-ci ildən bəri xidmətdən kənarda idi. Onun təmiri illərlə ləngidildi, xərclər isə getdikcə artdı. Bu vəziyyət gəminin müasir döyüş şərtlərinə uyğunluğu ilə bağlı suallar doğurdu.
Rusiya dövlət gəmiqayırma şirkəti olan USC-nin prezidenti Andrey Kostin, “Kommersant” qəzetinə açıqlamasında “Artıq onu təmir etməyin mənası yoxdur” deyə bildirib.
"Admiral Kuznetsov", Moskvanın Suriyadakı hərbi əməliyyatlarında iştirak etsə də, son səkkiz ildə tamamilə fəaliyyətsiz qalıb. Onun utilizasiyası, xüsusilə Ukraynanın pilotsuz uçuş aparatlarının Rusiya Qara dəniz Donanmasını Krımdakı əsas bazasından uzaqlaşdırmasından sonra, Rusiyanın dəniz gücünün zəiflədiyinə dair göstərici kimi dəyərləndirilir.
Kostin, Rusiyanın şimal-qərbində bir nüvə sualtı gəmisinin təhvil mərasimindən sonra jurnalistlərin suallarını cavablandırarkən, gəminin artıq ya satılacağını, ya da utilizasiya ediləcəyini, lakin hələlik yekun qərarın verilmədiyini bildirib.
305 metr uzunluğunda olan “Admiral Kuznetsov”, Sovet İttifaqı tərəfindən inşa edilmiş son ağır aviadaşıyıcı gəmi idi. O, hava qüvvəsi və hücum qabiliyyətini birləşdirmək məqsədilə dizayn edilmişdi. SSRİ-nin dağılmasından sonra gəmi Rusiyanın Şimal Donanmasına təhvil verildi və Suriya münaqişəsində istifadə olundu.
59 min tonluq yükqaldırma qabiliyyətinə malik gəmi, 8 400 dəniz mili məsafə qət edə bilir, 2 600 nəfərlik heyəti daşıya bilir və göyərtəsində 26 sabit qanadlı qırıcı təyyarə ilə 24 helikopter yerləşdirə bilirdi.
Lakin gəmi illərdir texniki nasazlıqlarla üzləşirdi. ABŞ-ın “The National Interest” jurnalı onu dünyanın ən zəif aviadaşıyıcıları siyahısına daxil etmişdi.
