"Inter Miami"də çıxış edən məşhur futbolçu Luis Suares qalmaqallı bir hadisə ilə gündəmə gəlib.
Sherg.az xəbər verir ki, Şimali və Mərkəzi Amerika Liqa Kubokunun finalında "Seattle Sounders" ilə "Inter Miami" üz-üzə gəlib.
Lumen Field stadionunda keçirilən qarşılaşma "Seattle Sounders"in 3:0 hesablı qələbəsi ilə yekunlaşıb.
Ev sahibinə qələbəni gətirən qolları Osaze De Rosario, 82-ci dəqiqədə penalti ilə Aleksander Roldan və 89-cu dəqiqədə Pol Rotrok vurub.
Bu nəticə ilə "Seattle Sounders" Şimali və Mərkəzi Amerika Liqa Kubokunun sahibi olub. Lionel Messi, Luis Suares, Jordi Alba və Serxio Buskets kimi ulduzların formasını geyindiyi "Inter Miami" isə ikinci yeri tutmaqla kifayətlənib.
Finalın itirilməsinin ardından "Inter Miami"də əhval-ruhiyyə xeyli pisləşib. Məşhur uruqvaylı forvard Luis Suaresin matçdan sonra etdiyi hərəkət isə dünya gündəminə düşüb.
Suares oyunsonrası mübahisə zamanı rəqib komandanın məşqçi heyətində olan şəxslərdən birinin üzünə tüpürərək hücum edib.
Hadisə zamanı həmin şəxs reaksiya göstərməsə də, futbolçular Suaresi dərhal oradan uzaqlaşdırıblar.
Luis Suares, Uruqvay milli komandası ilə iştirak etdiyi FIFA Dünya Kubokunda İtaliya millisinin müdafiəçisi Corco Çiellinini dişləmiş və buna görə 9 milli oyun və 4 ay futboldan uzaqlaşdırma cəzası almışdı.
