2008-ci ildən bəri komandamızda 4 əcnəbi mütəxəssis çalışıb və onların hər biri uğursuzluğu ilə seçilib
DÇ-2022-nin Avropa zonası üzrə seçmə mərhələsində II dövrə start götürüb. Azərbaycan yığması VI turda Portuqaliya ilə qarşılaşıb. Millimiz A qrupunun favoritini Bakı Olimpiya Stadionunda qəbul edib. Bakıya Kriştiano Ronaldosuz gələn Fernandu Santuşun yetirmələri matçın taleyini ilk yarıda həll ediblər. Maksim Medvedyev və Anton Krivotsyukun xidmətindən məhrum millimiz rəqibin hücumları qarşısında tab gətirməyib. Fasiləyədək iki qol vuran portuqaliyalılar ikinci hissədə fərqi üç topa çatdıraraq Bakıda asan qələbə qazanıblar. Təəssüf ki, bu, ilk məğlubiyyət deyil. Millimiz “qara zolaq”dakı yolunu davam etdirməkdədir. Bu isə narahatverici məqamdır.
Əməkdar jurnalist, “Qol.az” saytının baş redaktoru Aydın Bağırov millimizin DÇ-2022-dəki performansını “Şərq”ə təhlil edib. O, Azərbaycanın seçmə mərhələdə beş oyundan cəmi bir xal topladığını nəzərə çatdırıb:
“Yüz faizlik nəticənin 15 xal olduğunu nəzərə alsaq, bu heç də ürəkaçan nəticə deyil. Əlbəttə, Portuqaliya kimi bir komandaya qalib gəlməyi gözləmirdim. Yəni uduzmaq mənim üçün o qədər də təəccüblü olmadı. Uğursuzluğumuz 12 ildir davam edir. Bu, komandadakı sistemsizliklə əlaqədardır. Federasiyadakı nöqsanlar millimizin nəticələrinə də təsir edir. 2008-ci ildən bəri komandamızda 4 əcnəbi mütəxəssis çalışıb və onların hər biri uğursuzluğu ilə seçilib. Beləliklə, xarici məşqçi siyasəti fiaskoya uğrayıb”.
A.Bağırovun sözlərinə görə, ciddi islahatlara ehtiyac var:
“Prezident İlham Əliyev yeni gənclər və idman nazirini qəbul edərkən federasiyalardakı nöqsanlardan da danışıb. Bu, həm də AFFA-ya aiddir. Problemlər ətrafında ciddi fikirləşməyə ehtiyac var. Futbol sistemi tamamilə dəyişməlidir. Hazırda ən ideal model “Qarabağ”dır. Bu komandada rəhbərlik və məşqçi arasında münasibətlər düzgün, şəffaf qurulub. Rəhbərlik baş məşqçinin işlərinə qarışmır və bütün məsuliyyəti Qurban Qurbanov özü daşıyır. Komandada maddi yeyinti yoxdur. Ona görə də uğur qazanırlar”.
