Yeni Zelandiya Parlamentində 2024-cü ilin noyabrında mübahisəli qanun layihəsinin səsverməsi öncəsi “haka” rəqsi ilə etiraz edən 3 yerli millət vəkili vəzifələrindən uzaqlaşdırılıb.
Sherg.az xəbər verir ki, Te Pati Maori Partiyasının həmsədrləri Debbie Nqareva-Packer və Raviri Vaititi 21 gün, partiyanın digər üzvü Hana-Ravhiti Maipi-Clarke isə 7 gün müddətinə parlamentdən kənarlaşdırılıb. Bu, Yeni Zelandiya parlament tarixində millət vəkillərinə verilmiş ən uzun müddətli uzaqlaşdırma cəzası sayılır.
Millət vəkilləri, Maorilərlə İngiltərə Krallığı arasında 184 il əvvəl imzalanmış müqavilənin şərtlərinin dəyişdirilməsini nəzərdə tutan qanun layihəsinə qarşı haka rəqsi ilə etiraz etmişdi.
Parlament İmtiyazlar Komitəsi cəzanı tövsiyə etsə də, Əmək Partiyası cəzanın ağır olduğunu bildirərək sadəcə xəbərdarlıqla kifayətlənməyi təklif edib.
