"Onlara qurban olum"
Hazırda Azərbaycan xalqı iki cəbhədə mübarizə aparır. Birincisi koronavirus infeksiyasıdır ki, onunla savaşımız aylardır davam edir. İkincisi isə bədnam qonşularımızdır ki, onların vandalizm hərəkətlərini, xainliklərini illərdir görürük.
Hələ əzəli torpaqlarımızı işğal etməkləri bəs deyilmiş kimi, sərhəddə atəşkəsi pozaraq, təxribat törətməyə çalışırlar. Hərə dəfə şanlı ordumuz tərəfindən susdurularaq, layiqincə cavablarını alırlar. Şübhəsiz bir gün düşmənin səsini həmişəlik kəsib, Qarabağımıza qovuşacağıq. Millətimiz həmrəy şəkildə səbr və təmkinlə indilərdə gedən döyüşlərin bizim xeryrimizə sona çatmasını gözləyir.
Bəs gəlin görək dəyərli sənətkarlarımız, ziyalılarımız içində bulunduğumuz vəziyyət haqqında nə düşünürlər ?
Məsələ ilə bağlı “Sherg.az”a danışan tanınmış aktrisa, Xalq artisti Afaq Bəşirqızı söyləyib ki, hər birimiz zəfərə inamla yanaşmalıyıq:
“Hamımız səfərbər olmalıyıq! Ölkə vətəndaşları olaraq özümüzə, ordumuzun gücünə, zehnimizə, inanıb müharibəyə qalxmalıyıq. Artıq bu dığaların sonudur! Çünki güzəştlər, atəşkəslər və sairlər etmişik.
Təqsir bizdə olmasa da günahkarın missiyalarını boynumuza götürmüşük. Amma bunlar hələ də torpağımın balalarını şəhid edirlər, təxribat törədirlər. Allah şükürlər olsun ki, ön cəbhə ilə əlaqə saxlayıram. Sərhədə könüllülərimiz gedir, igid oğullarımız, qardaşlarımız hamısı vuruşmaq istəyir. Onlara qurban olum...
Mən qələbə ümidiləyəm!..”
