“Uğurlu insanların üç sirri var: özünə inam, müsbət düşüncə, dürüstlük və çalışqanlıq. Çoxları bu üç prinsipi bilir, lakin onlardan az bir qismi onları həyata keçirir”.
Conor McGregor
Məhşur filmdə deyildiyi kimi “Bu kino ki var, çox qəliz məsələdir. Həm qəlizdir, həm də ki, vacib!..” Kino vacib olduğu kimi onun yaranmasında vacib insanlar var. Həmin vacib və həlledici insanlardan biri də səs rejissorudur. Səs rejissoru yalnız səs ardıcıllığının keyfiyyətinə deyil, həmçinin filmin dramaturji ardıcıllığına, ifadəli səslərin dolğun yaranmasına, səs və təsvirin sinxronlaşmasına nəzarət etməklə yanaşı, səsin redaktəsinə də rəhbərlik edir. Bu sahə olduqca çətin və bir o qədər də maraqlı peşədir. Səs rejissoru, bir filmdə və ya serialda səslərin sinxron düzülməsi, təmizlənməsi, dublajı, foley səslənməsi, səs dizaynı və balanslaşdırılması ilə məşğul olur. Səs rejissoru səsin keyfiyyətini artırır, atmosfer yaradır və tamaşaçının hislərini oyadaraq ekran işinin təsirini gücləndirir.Səs rejissorlarının birinci növbədə sənətə olan sevgisi, intuisiyası və diqqəti ətraf aləmin səslərini həssaslıqla dinləməyə, onları olduğu kimi, inandırıcı, yüksəkkeyfiyyətli səslərlə filmə daxil etməyə də imkan verir.
Bu dəfəki yazımın qəhrəmanı bir çox ekran işində (bədii filmlər, seriallar, animasiyalar), imzası olan hər bir işində peşəkarlıq nümayiş etdirən tanınmış səs rejissorlarından biri, Azərbaycan kinematoqrafiyasında səs post-prodakşn sahəsində 10 illik peşəkar təcrübəyə malik Nadir Mahmudovdur.
Nadir Mahmudov 21 yanvar 1989-cu ildə Azərbaycan üçün bir çox görkəmli şəxslər yetirən Naxçıvan Muxtar Respublikasında anadan olub. Uşaq yaşlarından filmlərə olan marağı onu bu sahəyə gətirib çıxarıb. Ali təhsilini başqa sahədə alsa da sənət və kino sahəsinə olan sevgisi onu kino sahəsinə gətirdi. Həyatını kinoya, onun inkişafına həsr etdi. Peşəkar karyerasına 2014-cü ildən Azərbaycan serial və filmlərinin səs post-prodakşn sahəsində çalışır. O, səs rejissoru, səs redaktoru və səs dizayneri kimi bir çox yerli serial və filmdə fəaliyyət göstərib. Bunlardan hamının sevə-sevə izlədiyi “Nabat”, “Xocalı ana harayı”, “O gecə”, “Əqrəb mövsümü”, “Günəşim ol”, “Laləli saray” “Xosrov və Şirin”, “Şeyx Sənan” “Simurq” və s. Nadir Mahmudov həm də animasiya sahəsində də öz sözünü demiş yaradıcı insanlardan sayılır. Onun işlədiyi “Hədis”, “Baharın oğurlanması” və s.
"Azərbaycanfilm" kimi mötəbər yerdən əlavə onun adını həmişə ölkənin kino sahəsində mühüm yerləri olan "Oscar Production", "Oksi Media Production", "SFN Production" prodakşnlarda görmək olur.
Peşəkar səs rejissoru üçün əsas hədəf, səssiz bir görüntüyə həyat verməkdir. Səs dizaynı, amtosfer səsləri və floey vasistəsi ilə hər kadrı canlandırmaq, hətta danışdırmaq mümkündür. Bu işdə əsil ustalıq- səssiz kadrları danışdırmaqdır deyərdim. Ona görə də həmişə Nadir Mahmudovu səssiz kadrları danışdıran adam deyirəm.Çünki o sadaladığım işlərin ustasıdır.
Sahəsində uğurlu səs rejissoru kimi çalışan qəhrəmanımın işlərində foley, səs dizaynı, dialoq redaktəsi və səs mastering işləri xüsusi yer tutur. Onun rəhbəri olduğu "NM studio"da isə Azərbaycanda ilk Dolby Atmos sistemi qurulub. Bu sistemin Azərbaycan kinosunun inkişafında böyük rol oynayır.
Nadir Mahmudovla çalışan rejissorlar, onu yaxından tanıyanlar inanır ki, yazımızın qəhrəmanı gələcəkdə daha böyük uğurlar qazanacaq və Azərbaycan kinosunda daha da mühüm yer tutacaq. Buna inanıram….
Turan Etibaroğlu
