Bu tək ailənin seçimi deyil, ölkənin demoqrafik vəziyyətinə təsir edən bir haldır
Rusiya və Moskva patriarxı Kirill federal səviyyədə abortların qadağan olunmasını təklif edib. Onun fikrincə, həkimlər qadınlarda hamiləliyi pozmaq fikri oyadır, bunu dəstəkləyir və bunda maddi maraqları var: “Rusiya ərazisinə görə dünyanın nəhəng ölkəsidir, amma əhali sayı çox azdır. Şükür ki, qanuni səviyyədə abortların azaldılmasına doğru bəzi təkliflər irəli sürülür, addımlar atılır. Amma yenə də Rusiyada abortlar əvvəlki illərdən qat-qat çoxdur. Moldovada olan abort qadağasının digər regionlarda da olacağına ümid edirəm.
Hazırda Rusiyada populyasiya və demoqrafik böhran var. Həqiqətən biz daha çox insana ehtiyac duyan ölkəyik. Həkimlərin qadınları aborta təşviq etməsi isə cinayətdir”.
Qeyd edək ki, son illər Azərbaycanda da abortların sayının artması ciddi narahatlıq doğurur. Xüsusən də, selektiv abortlarla bağlı ekspertlər həyəcan təbili çalır.
Sosioloq Lalə Mehralı da “Sherg.az"a açıqlamasında qeyd edib ki, abort Azərbaycanda da qanunla qadağan edilməlidir. Azərbaycanda 13-cü həftəyə qədər hamiləliyi sonlandırmağın mümkün olduğunu vurğulayan sosioloq deyib ki, 14-cü həftədən sonra canlı dölü abort etməyə icazə yoxdur:
“Azərbaycanda ailələrin maarifləndirilməsi, arzuolunmaz hamiləlikdən qorunmaqla bağlı məlumatlandırılması effektiv nəticə vermədi. Dəfələrlə rast gəlmişəm ki, qadın məsləhətxanalarında qadınlara broşürlər verilir və onun üzərində hamiləlikdən qorunmaq üçün müxtəlif üsullar qeyd edilir. Abort kifayət qədər bahalı prosedurdur. 300-500 manat arasında dəyişir qiymətlər. Halbuki cəmi 100-150 manata hamiləlikdən 90 faiz qoruyan uşaqlıqdaxili spiral həm büdcələrinə uyğundur, həm də zərərsizdir. Etinadsızlıq və yaxud cahillikdən qadınlarımız bu çağırışlara əhəmiyyət vermir. Abort sadəcə cərrahi bir prosedur deyil. Bir insanın qəsdən başqa bir insanı öldürməsi deməkdir. Doğulub-doğulmamasından asılı olmayaraq 13 həftəliyindən etibarən bütün orqanları ilə böyüyən bir varlıqdır. Onu məhv eləmək də insan öldürmək kimi cinayət hesab olunmalıdır. Onu da deyim ki, bu mövzuda prinsipial mövqe ortaya qoyub abortdan imtina edən vicdanlı həkimlərimiz var. Lakin əksəriyyət 13-cü həftəyə qədər olan hamiləlikləri sonlandırmağı qanunla qadağa olmadığını əsas gətirərək bu prosesə razılıq verir. Deməli, selektiv abortların qarşısını almaq, ümumilikdə abort statistikasını azaltmaq üçün qanundakı müvafiq maddəyə yenidən baxılmalıdır. Abort artıq sadəcə bir ailənin seçimi deyil, bu, ölkənin demoqrafik vəziyyətinə təsir edən bir haldır”.
