Uzun onilliklər boyunca USAİD, "Amerikanın Səsi" və "Azadlıq Radiosu" kimi strukturlar müxtəlif ölkələrdə, o cümlədən Azərbaycanda, ictimai rəyə təsir göstərmək və siyasi proseslərə müdaxilə etmək məqsədilə fəaliyyət göstəriblər. Bu qurumlar insan haqları və demokratiyanın müdafiəsi şüarı altında gizlənərək, əslində, Azərbaycan dövlətinə və xalqına qarşı çirkin kampaniyalar aparıblar.
Lakin Azərbaycan cəmiyyətində sağlam düşüncəyə malik, dövlətçilik mövqeyi tutan insanlar daim bu şər yuvalarının əsl məqsədini ifşa ediblər. Onların ölkəmizdə yaratmağa çalışdığı informasiya xaosuna qarşı mübarizə apararaq, həmin qurumlarla əməkdaşlıq edən xəyanətkarların gerçək simasını açıb göstəriblər. Bu gün isə bu strukturlar layiq olduqları yerdədirlər. Onların fəaliyyətinin məhdudlaşdırılması, həqiqətə və ədalətə xidmət edən bir qərardır. Bu addım təkcə Azərbaycanın deyil, milli maraqlarını qorumaq istəyən bütün ölkələrin informasiya müstəqilliyi uğrunda apardığı mübarizənin bir hissəsidir.
Politoloq Taleh Əliyev "Sherg.az"a bildirib ki, USAİD, "Amerikanın Səsi" və "Azadlıq Radiosu" kimi beynəlxalq strukturlar əslində ABŞ-ın yumşaq güc vasitələri hesab edilir. Bu qurumlar rəsmi olaraq demokratiya, insan haqları, azad seçkilər və digər universal dəyərlərin təbliği missiyasını daşıyırdı:
"Lakin faktiki olaraq Vaşinqton bu vasitələrlə özünə dost və müttəfiq ölkələrdə hakimiyyətdə olan tərəfdaşlarını dəstəkləyir, digər dövlətlərdə isə müxtəlif siyasi qrupları müdafiə edərək həmin ölkələrin siyasi hakimiyyətlərinə təzyiq və təsir göstərirdi. Azərbaycana gəldikdə, USAİD və digər bu tipli strukturlar uzun illər ərzində ölkəmizdə müxtəlif layihələr həyata keçirmiş, xüsusilə də kənd təsərrüfatı və idarəetmə sahələrində əməkdaşlıq edib. Bununla yanaşı, onların Azərbaycana qarşı qərəzli yanaşmalarına nəzər saldıqda, ABŞ-da güclü mövqeyə malik erməni lobbisinin də bu strukturlar vasitəsilə ölkəmizə qarşı qarayaxma kampaniyaları apardığını görmək mümkündür. Bu gün adıçəkilən qurumların fəaliyyəti dayandırılır. Lakin bu, Vaşinqtonun qlobal siyasətindən, xüsusən də birqütblü dünya siyasətindən imtina etməsi anlamına gəlmir".
Politoloq qeyd edib ki, mövcud tendensiyalar onu göstərir ki, qarşıdakı dövrdə dünyada barış və dialoq əvəzinə qarşıdurmalar və münaqişələr ön plana çıxacaq:
"Bu kontekstdə ABŞ yumşaq güc vasitələrinə ayırdığı vəsaiti üçüncü dünya ölkələrindən geri çəkilməklə, oradakı xaosu, vətəndaş müharibələrini və dövlətlərarası münaqişələrin idarəsi üçün istifadə edəcək. Bütün bunlar yaxın illərdə böyük miqyaslı müharibələrin başlanması ehtimalını artırır. Təəssüf ki, qlobal proseslər hazırda müsbət istiqamətdə inkişaf etmir".
