“Bu da təbii ki, münaqişənin hərbi yolla həllini sürətləndirir”
“Avropa Parlamentinin bir qrup deputatının bəyanatı göstərdi ki, beynəlxalq hüquq Azərbaycanın tərəfindədir. Azərbaycan haqlı tərəfdir”
“Avropa Parlamenti tamamilə haqlı olaraq Ermənistan tərəfinə bildirdi ki, ermənilər Qarabağa magistral yol çəkməklə, orada infrastruktur qurmaqla beynəlxalq hüququ pozurlar”.
Bunu “Sherg.az”a açıqlamasında Prezident yanında Dövlət İdarəçilik Akademiyasının müəllimi, Bakı Politoloqlar Klubunun rəhbəri Zaur Məmmədov deyib.
Politoloq bildirib ki, Ermənistanın zəbt etdiyi ərazilərdə tikinti işlərini həyata keçirməsi işğalın dərinləşməsidir:
“Ermənilər Dağlıq Qarabağı Ermənistana birləşdirmək üçün artıq üçüncü yolu çəkirlər. Ancaq əfsuslar olsun ki, bir sıra beynəlxalq qurumlar, ATƏT-in Minsk Qrupunun həmsədrləri bu məsələdə susmağa üstünlük verirlər. Hətta pandemiya dövründə belə ermənilərin separatçı və təxribatçı davranışlarına qarşı susqunluq nümayiş etdirirlər. Bu da təbii ki, bölgə ilə bağlı narahatlığı artırır və münaqişənin hərbi yolla həllini sürətləndirir. Ermənistan rəhbərliyi bilərəkdən Azərbaycana qarşı təxribatlara əl atır. Avropa Parlamentinin bir qrup deputatının bəyanatı göstərdi ki, beynəlxalq hüquq Azərbaycanın tərəfindədir. Azərbaycan haqlı tərəfdir”.
Z.Məmmədovun sözlərinə görə, ayrı-ayrı subyektlər hüquqi cəhətdən yanımızda yer alsalar da, siyasi baxımdan Ermənistana təzyiq göstərmirlər:
“Hər halda Avropanın nüfuzlu təsisatını təmsil edən deputatların birgə bəyanatı Ermənistan hakimiyyətinin ciddi nöqsanını ortaya qoymuş olur. Paşinyan hökuməti məhz ölkə ictimaiyyətinin diqqətini əsas proseslərdən yayındırmaq və nəzərləri Dağlıq Qarabağ rejiminə yönəltmək üçün müəyyən yollar axtarır. Əslində baş nazirin başaq çıxış yolu yoxdur. Çünki Paşinyan verdiyi vədlərin heç birini reallaşdıra bilməyib və koronavirus pandemiyasına görə ölkə acınacaqlı duruma düşüb”.
