Tanınmış ədəbi-tənqidçi Əsəd Cahangir də Şuşada keçirilən Vaqif Poeziya günlərində iştirak edib. O, da Şuşanı görən hər kəs kimi ürəyidolu, bol təəssüratlarla qayıdıb. Əsəd bəylə əlaqə saxlayıb, gördüklərini, duyğularını bizimlə bölüşməsini istədik.
O, “Sherg.az”a Şuşada keçən iki günü nağıla bənzətdiyini söylədi:
“Cəmi 10 ay öncə Şuşada olmaq bir yuxu kimi görünürdü. Amma Ali Baş Komandan cənab İlham Əliyevin uzaqgörən, bacarıqlı və müdrik siyasəti, xalqımızın, ordumuzun rəşadəti ilə bu nağılı gerçəkləşdirmək, Şuşaya getmək nəsib oldu. Həm özümün, həm də bütün ziyalıların, millətimzin adından Cənab prezidentə təşəkkür edirəm.
Onu da deyim ki, Şuşa ərazi olaraq elə də böyük şəhər deyil. Lakin orada bir çox tarixi abidə var. Ərazisi Şuşadan 10 dəfə böyük şəhərlərdən qat-qat dərin tarixi mənaya malikdir. Orada olduğumuz müddətdə mümkün qədər vaxtdan istifadə etməyə, şəhərin hər yerində olmağa çalışdıq.
Şuşa dağlıq relyefdə yerləşir. Küçələr gah yuxarı, gah da aşağı doğru gedir. Bakıdan fərqlidir, həmçinin taksi və maşın da yoxdur. Ona görə elə də asan deyildi. Yenə də Şuşanı qarış-qarış gəzməyə nail olduq.
Mənim söylədiklərimi anlamaq üçün o anları yaşamaq lazımdır. Erməni vandalizmi Şuşadan da yan keçməyib, otuz il ərzində şəhər xarabalığa çevrilib. Şuşa azad olunduqdan sonra burada təmir-bərpa işlərinə başlanıldı. Artıq tarixi mədəni küçələr, abidələr bərpa olunub. Yaxın bir il ərzində şəhərin yenidənqurma, təmir işləri bitəcək.
Şuşa yalnız Azərbaycanın deyil, dünyanın mədəniyyət mərkəzlərindən birinə çevriləcək. Vaqif Poeziya günlərinin açılışında Prezident Şuşanın Azərbaycan tarixində rolu, Vaqifin ədəbiyyatımızdakı yeri, məqbərinin tarixi, onun yenidən bərpası məsələləri ilə bağlı geniş çıxış etdi.
Bunun yalnız mədəni deyil, həm də dövlətçilik hadisəsi olduğunu, mühüm beynəlxalq siyasi əhəmiyyət daşıdığını söylədi. Biz istər 1982-ci ildə, istərsə də bu gün Vaqif məqbərəsini bərpa etməklə bütün dünyaya mesaj göndərdik.
Dedik ki, Molla Pənah Vaqif bizim nəhəng şairimizdir, müasir Azərbaycan poeziyasının banisi, görkəmli dövlət xadimidir. Onun məqbərəsi bir daha göstərir ki, Şuşa, Qarabağ Azərbaycandır.
Ermənilərin nə Şuşaya, nə də Qarabağa aidiyyəti var. Onlar Vaqif böyüklükdə şair yetişdirə bilməyiblər. İkinci bir tərəfdən Şuşanın küçələri ilə gəzib, tarixi abidələrinə baxdım.
Dedim ki, ermənilər Şuşanı öz şəhərləri hesab edirdilərsə, niyə 30 il müddətində orada təmir-tikinti işləri aparmayıblar? Çünki bilirdilər ki, Şuşa onların deyil, gec-tez öz sahibləri gələcək.
Bu gün biz qayıtdıq. Qayıdışın başında M.P.Vaqifin ruhu dururdu, biz də onun müqəddəs məqbərəsinin önündə toplaşaraq bütöv Azərbaycanı təmsil etdik. Sonsuz qürur duyurduq”.
