Azərbayca münasibətləri Hindistanın gərginləşdirici siyasəti olmadan normallaşdırmaq niyyətindədir
Çin rəhbəri Azərbaycanın təşkilata tam üzvlüyünü birbaşa dəstəkləyir
Çinin Tiencin şəhərində Azərbaycan Prezidenti İlham Əliyevin Pakistanın Baş naziri Məhəmməd Şahbaz Şərif ilə görüşü olub.
Məhəmməd Şahbaz Şərif bu ilin aprel-may aylarında Hindistanın Pakistana qarşı hərbi təcavüzü zamanı Azərbaycanın göstərdiyi siyasi dəstəyə və həmrəyliyə görə Pakistan xalqı və hökuməti adından dövlətimizin başçısına bir daha təşəkkürünü bildirib.
Azərbaycan-Pakistan əlaqələrinin qardaşlığa əsaslandığını deyən dövlət başçısı Pakistanın Hindistan üzərində qələbəsi münasibətilə təbriklərini çatdırıb. Prezident İlham Əliyev ölkəmizin Pakistana göstərdiyi dəstəyə cavab olaraq Hindistanın beynəlxalq təşkilatlarda Azərbaycandan qisas almağa çalışdığını deyib.
Bunun ölkəmiz üçün heç bir əhəmiyyət daşımadığını vurğulayan dövlət başçısı qeyd edib ki, Azərbaycan üçün qardaşlıq münasibətləri hər şeydən üstündür.
Politoloq Oqtay Qasımov Sherg.az-a söyləyib ki, Azərbaycan və Pakistan liderlərinin görüşləri artıq ənənəvi bir hal alıb:
"Həm iki tərəfli ziyarətlər, həm də beynəlxalq tədbirlər çərçivəsində davamlı şəkildə bu görüşlər həyata keçirilir. Çünki biz iki strateji tərəfdaşı ölkəyik və bir-birimizi qətiyyətlə dəstəkləyirik. Çində keçirilən bu görüş də məhz həmin dostluq, qardaşlıq və strateji tərəfdaşlıq münasibətlərinin bir nümunəsidir. Prezident İlham Əliyevin Hindistanla bağlı səsləndirdiyi fikirlərə gəlincə, Azərbaycan bir mənalı şəkildə Pakistana dəstək verir, suverenliyini müdafiə edir və rəsmi Dehlinin haqsız mövqeyini qəbullanmır. Hindistanın Azərbaycandan qisas almaq çabalarının ciddi nəticələri olmayacaq. Çünki Azərbaycan Şanxay Əməkdaşlıq Təşkilatında tərəfdaş üzv kimi fəaliyyət göstərir və tam hüquqlu üzv olması müəyyən zaman tələb edir. Lakin nəzərə alaq ki, Çin rəhbəri Azərbaycanın təşkilata tam üzvlüyünü birbaşa dəstəkləyir".
Analitik əlavə edib ki, ölkəmiz Hindistanla münasibətlərin normal olmasını istəyir:
"Odur ki, Azərbaycan bu münasibətləri bərabər hüquqlu, bölgədə qarışıqlıq yaratmadan, Hindistanın gərginləşdirici siyasəti olmadan normallaşdırmaq niyyətindədir. Hindistanın bir tərəfli mövqe tutmaması vacibdir. Məhz bu səbəbdən ki, Azərbaycan və Ermənistan arasında normallaşma baş verdikdən sonra Hindistanla da müzakirələr aparılacaq. Pakistan və Ermənistanla diplomatik münasibətlərin qurulması prosesi artıq təməlqoyma mərhələsindədir. Bu, bizim mövqeyimizi bir daha nümayiş etdirir. Hindistana gəldikdə isə onun Cənubi Qafqazda, Ermənistan üzərindən bölgədə mövqeyini gücləndirmək və təhsil imkanlarını artırmaq siyasəti, qeyri-konstruktiv davranışları səbəbindən ciddi nəticələr verməyəcək".
