Uzunmüddətli dövrdə Rusiyada neft hasilatının həcmi azalacaq, maya dəyəri isə yüksələcək.
Teleqraf xəbər verir ki, bu barədə "The Wall Street Journal" (WSJ) yazıb.
Nəşr bildirir ki, 25 ildir Rusiya iqtisadiyyatı neft gəlirlərinə əsaslanır və bu vəsaitlər Kremlin Ukraynaya qarşı müharibəni maliyyələşdirməsinə imkan verib. Lakin bu pulların mənbəyi tükənmək üzrədir.
Nəşrin məlumatına görə, Moskva əsasən mövcud yataqlardan hasilata yönəlib, yeni yataqların kəşfiyyatı isə demək olar ki, dayanıb. Sovet dövründən qalma iri yataqlar artıq tükənir, buna görə də rus şirkətləri Arktika və Sibirdəki çətin çıxarılan yataqlara üz tutur. Amma bu proses üçün lazım olan müasir texnologiyalar Rusiyada yoxdur, sanksiyalar səbəbindən ABŞ-dən alınması isə mümkünsüzdür.
Bundan başqa, müharibə neft sektoruna əlavə zərbə vurub. İşçilərin bir hissəsi cəbhəyə göndərilib və ya ölkəni tərk edib, hökumət isə neft şirkətlərinin vergi yükünü artırıb.
Rusiya Energetika Nazirliyi bildirir ki, hazırda hasilatın 59 faizi çətin çıxarılan yataqlardan təmin olunur, onilliyin sonuna bu rəqəm 80 faizə çatacaq. Bu isə maya dəyərinin kəskin artacağı anlamına gəlir.
Ekspertlər hesab edir ki, hətta müharibə bitsə və sanksiyalar ləğv olunsa belə, Rusiya neft sənayesində yaranan problemlərin aradan qaldırılması uzun illər tələb edəcək.
