Almaniya Prezidentinin sosial media profilində 30 mart 2025-ci ildə yayımlanan bir paylaşım Azərbaycan ictimaiyyətində geniş narazılığa səbəb olub. Söz konusu paylaşımda artıq keçmişin qalığı olan qondarma rejimin bayrağının yerləşdirilməsi və altına yazılmış mətn, Azərbaycanın ərazi bütövlüyü ilə birbaşa ziddiyyət təşkil edirdi. Bu, Azərbaycan tərəfi tərəfindən ciddi şəkildə etirazla qarşılanıb və dərhal iki ölkənin Prezident Administrasiyaları və Xarici İşlər Nazirlikləri arasında diplomatik təmaslar başlanıb. Almaniya tərəfi, paylaşımın səhvən edildiyini etiraf edərək, həmin postu dərhal silib. Almaniya Prezident Administrasiyasının rəhbəri tərəfindən Azərbaycan tərəfinə ünvanlanmış məktubda, baş vermiş bu hadisəyə görə üzrxahlıq ifadə olunub və məktubun mediaya verilməsi üçün razılıq verilib. Məktubda qeyd edilib ki, səhv baş verib və Almaniya, Azərbaycanın ərazi bütövlüyünü və suverenliyini tamamilə dəstəkləyir.
Milli Məclisin deputatı Elçin Mirzəbəyli “Sherg.az”a vurğulayıb ki, Almaniya prezidenti Frank-Valter Ştaynmayerin səhifəsində qondarma rejiminin əski parçasının paylaşılmasının təxribat olub-olmadığını araşdırmaq Almaniya Prezidenti Administrasiyasının və müvafiq qurumların üzərinə düşür:
“Düşünürəm ki, bu qədər ciddi səhvə yol verilməsi təsadüfi deyil. Çünki Almaniya prezidentinin regiona səfəri ərəfəsində Deutsche Wellenin platformasında da ermənilərin bilavəsiə Azərbaycan əleyhinə hazırladığı sənədli film yayılmışdı. Həmin sənədli filmdə Azərbaycan bağlı faktlar ermənilərə münasibətdə sərgilənir və feyk məlumatlar yer alırdı. Bu proseslər biri-biriylə bağlı olan hadisələrdir və belə böyük ciddi səhvin təsadüfi olması inandırıcı görünmür. Qənayətimə görə, ortalıqda böyük təxribat mövcuddur. Almaniyanın səhvini anlayaraq Azərbaycandan rəsmi qaydada üzr istəməsi Prezident İlham Əliyevin nüfuzundan və ölkəmizin regionda olan əhəmiyyətindən irəli gəlir. Şübhəsiz ki, üzrxahlıq müsbət yanaşmadır, lakin bununla yanaşı baş verən təxribatların araşdırmaların başladılması Almaniyanın da xeyrinə olar. Çünki çox ciddi təxribatçı fəaliyyət göstərən erməni diasporu və onlarla əlaqədə olan şəxslər var”.
