“Bu müsabiqənin də məqsədi yaza bilən, potensialı olan imzaları üzə çıxarmaqdır”
“TEAS Press” yayım evi yeni roman müsabiqəsi elan edib. Bu, ilk növbədə, yeni yazarların nəşr edilməsi üçün bir seleksiya işi hesab edilməlidir.
Müasir ədəbiyyatımızın inkişafı və gənc yazıçılara dəstək məqsədilə təşkil olunan müsabiqəyə hər müəllif tərəfindən yalnız bir əsər təqdim edilə bilər. Əsərlər Azərbaycan dilində, roman janrında yazılmalı və müsabiqə üçün müəyyən olunmuş meyarlara cavab vermək şərti ilə indiyədək heç yerdə çap olunmamalıdır.
Müsabiqə iştirakçılarının yaş həddi 18-35 arasında olmalıdır.
Yayım evinin müsabiqədə iştirak üçün yaş məhdudiyyəti tələbi yazarlar arasında birmənalı qarşılanmayıb.
Maraqlıdır, ədəbi müsabiqələrdə yaş məhdudiyyəti olmalıdırmı?
Yazıçı Azad Qaradərəli sosial media hesabında bu mövzuya toxunub. Onun fikrincə, roman müsabiqəsinə 35 yaşa qədər olan yazarların qoşulması tələbi çox gülməlidir:
“Ay kişi, bir şeyin ki, adı ROMAN ola, onu 35 yaşında cavan necə yazsın?! Ay başınıza dönüm, adam gərək bir-iki dəfə yıxıla, dura, roman yaşaya, yaralarını sarıya və qüvvə toplayıb girişə roman yazmağa... (Əlbəttə, əlahiddə istedaddan danışımıram, daha beləsinə heç müsabiqə-zad da lazım deyil!) Yoxsa ki, bu cavan-çoluğu yolundan eləməyin, qoyun bu ağır dövrdə, çörəyin ilan ağzında olduğu vaxtda gedib özlərinə bir gün ağlasınlar...
Onu da deyim ki, istənilən halda ədəbiyyat müsabiqələrini dəstəkləyirəm. İndi bizə belə şeylər hava və su kimi lazımdır. Amma və lakin... elan etməmişdən qabaq bir söz bilənlə məsləhətləşin... Uğurlar, yazana da, yazdırana da!”.
Yazar Cəlil Cavanşir isə “Sherg.az"a açıqlamasında “TEAS Press” nəşrlər evinin gənclər üçün elan etdiyi müsabiqənin alqışalayiq olduğunu vurğulayıb:
“Birinci müsabiqə çox gözəl təşkil olunmuşdu, münsiflər heyəti çox ciddi imzalar idi. Amma ədəbi mühitdə səs-küyə, ajiotaja səbəb olmadı. Çünki məhz yaş məhdudiyyəti ilə bağlı müsabiqəyə çox adam qoşula bilməmişdi. Lakin gənclər arasında da roman müsabiqəsi keçirməyi normal və vacib hesab edirəm. 35 yaşına qədər çox ciddi əsərlər yazmış xeyli müəllif sadalaya bilərəm. Bu müsabiqənin də məqsədi yaza bilən, potensialı olan imzaları üzə çıxarmaqdır. Azad Qaradərəli mənim sevdiyim yazıçıdır, xətri əziz, sayğıdəyər insandır. Amma dövlətdən tələb olunmalı şeyləri özəl nəşriyyatlardan, qurumlardan tələb etmək insafsızlıqdır. İndi bir özəl nəşriyyat normal büdcəli müsabiqə elan edib, 35 yaşa qədər olan yazıçılara şərait yaradır, biz bu nəşriyyatı niyə ələ salaq, tənqid edək? Uğurlar arzulayaq və dəstəkləyək ki, gözəl işlər çoxalsın, ənənə halını alsın”.
