Nazirlər Kabineti yanında Operativ Qərargahın keçirdiyi mətbuat konfransında Azərbaycan Prezidentinin İqtisadi məsələlər üzrə köməkçisi Şahmar Mövsümov bildirib ki, hazırda Azərbaycanın kifayət qədər vaksin ehtiyatı var. Onun sözlərinə görə, bununla bağlı hər hansı bir problem yoxdur: “Vaksin ehtiyatımız ilin sonuna kimi kifayət edəcək. Əgər ölkədə 3-cü doza tətbiq olunarsa, növbəti il üçün vaksinlərin alınması barədə danışıqlar aparılacaq”.
Həkim-psixoterapevt Əli Nağıyev bu barədə fikirlərini “Sherg.az”la bölüşdü:
“Üçüncü doza xüsusilə xəstələrlə kontaktda olanlar üçün vacibdir. Digər tərəfdən nəzərə almaq lazımdır ki, peyvəndlə süni şəkildə yaradılan immunitet hüceyrələri 6 ay-1 il sonra zəifləyir. Bu mənada üçüncü dozanın tətbiqi nəzəri cəhətdən məqsədəuyğundur və heç bir təhlükə yoxdur”.
