Baş Dövlət Yol Polisi İdarəsinin Ekoloji Nəzarət Bölüyünün əməkdaşları tərəfindən həyata keçirilən tədbirlər nəticəsində narkotik maddənin təsiri altında sərnişin daşıma fəaliyyəti göstərən sürücü ifşa olunub.
DİN-in Mətbuat xidməti xəbər verir ki, stasionar postda yoxlama-nəzarət qaydasında saxlanılan “Hyundai” markalı mikroavtobusun sürücüsü Hafiz Piriyevin sənədləri yoxlanılarkən hərəkətləri şübhə doğurduğundan o, tibbi müayinədən keçməyə dəvət olunub.
Müayinə zamanı Hafiz Piriyevin narkotik maddə qəbul etməsi müəyyən edilib və o, narkotik istifadəçisi olduğunu etiraf edib.
Barəsində inzibati protokol tərtib edilən Hafiz Piriyev məhkəmənin qərarı ilə sürücülük hüququ 2 il müddətinə məhdudlaşdırılmaqla 1 ay müddətində inzibati qaydada həbs olunub.
Sərnişinlərin həyatı üçün təhlükə yarada biləcək hadisənin qarşısı növbəti dəfə DYP əməkdaşlarının sayıqlığı nəticəsində alınsa da, sərnişin daşıma fəaliyyəti göstərən fiziki və hüquqi şəxslər bu sahədə daha kəsərli tədbirlər görməli, sükan etibar etdikləri sürücülərlə bağlı qanunvericiliyə uyğun nəzarət tədbirləri gücləndirilməlidir.
Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, narkotik vasitələrin təsiri altında nəqliyyat vasitəsinin idarə olunması, yol hərəkəti təhlükəsizliyi baxımından ən ciddi hüquqpozmalardan biri hesab olunur:
“Bu məsələ Azərbaycan Respublikasının İnzibati Xətalar Məcəlləsində də xüsusi qaydada tənzimlənib. Belə ki, spirtli içkilərin təsiri altında nəqliyyat vasitəsinin idarə olunması ilə narkotik maddələrin təsiri altında eyni əməlin törədilməsi arasında hüquqi məsuliyyət baxımından fərq qoyulmuşdur. Narkotik maddələrin təsiri altında avtomobil idarə edən sürücülər barəsində daha ağır inzibati sanksiyalar tətbiq edilir. İnzibati Xətalar Məcəlləsinin müvafiq maddələrinə əsasən, əgər şəxs ictimai nəqliyyat vasitəsini və ya ümumi istifadədə olan nəqliyyat vasitəsini narkotik maddənin təsiri altında idarə edirsə, bu zaman ona qarşı inzibati qaydada azadlıqdan məhrumetmə və sürücülük hüququndan məhrumetmə cəzası tətbiq edilir. Özünəməxsus və şəxsi istifadəyə verilmiş avtomobillərdə isə cəza bir qədər yüngülləşdirilmiş formada tətbiq oluna bilər, lakin bu hallar da az əhəmiyyətli sayılmamalıdır. Müasir dövrdə narkomaniyanın cəmiyyətin müxtəlif sahələrinə, o cümlədən nəqliyyat sektoruna da sirayət etməsi narahatedici tendensiyadır. Yollarda narkotik vasitələrin təsiri altında olan sürücülərə rast gəlinməsi artıq mütəmadi hal alıb və bu, ictimai təhlükəsizlik üçün ciddi təhdidə çevrilib. Narkotik maddələrin orqanizmdə qalma müddəti spirtli içkilərlə müqayisədə daha uzundur. Spirtli içkilər bir neçə saatdan bir günə qədər orqanizmdən xaric olursa, bəzi narkotik maddələr insan orqanizmində aylarla qalmaqda davam edir. Bu da onların təsirinin daha uzunmüddətli və daha təhlükəli olduğunu göstərir. Yol hərəkəti iştirakçılarının təhlükəsizliyinin təmin olunması məqsədilə Daxili İşlər Nazirliyinin müvafiq struktur bölmələri tərəfindən səhər və axşam saatlarında mütəmadi olaraq profilaktik nəzarət tədbirləri həyata keçirilir. Bu tədbirlər nəticəsində narkotik vasitələrin təsiri altında olan sürücülər aşkar olunur və barələrində qanunvericiliyə uyğun tədbirlər görülür. Lakin bəzi hallarda mövcud nəzarət və yoxlama metodlarının yetərsiz olduğu da müşahidə olunur. Daha effektiv nəzarət mexanizminin tətbiqi avtomobillərə xüsusi texniki nəzarət vasitələrinin quraşdırılması və bu vasitələrin mütəmadi işlək vəziyyətdə saxlanılması təklif edilir. O da hələ ki, ölkəmizə gəlib çıxmayıb. Çünki dünyanın bir çox ölkələrində bu yoxdur”.
