“Peyvənd xəstəliyin qarşısını almır, sadəcə ağırlaşmaya imkan vermir”
“Təsadüfi deyil ki, vaksinləşən, amma yoluxan şəxslərdə adətən tromblaşma kimi hallar olmur”
"Orqanizm özü xəstəliklə mübarizə apara bilir. Pandemiya hələ davam edir. Çıxış yollarımız isə məlumdur və başqa alternativimiz yoxdur”
Koronavirusa yoluxma faktı yenidən artmaqdadır. Bir ara- yoluxma sayı xeyli azalanda sevinmişdik. Elə bilmişdik ki, kabus daha bitdi. Amma, deyəsən, əsl kabus qabaqda imiş... Vaksinləşmə də sürətlə davam edir. Çoxunun ümid yeri də məhz peyvənddir. Elə isə hazırkı tendensiya gələcək üçün nələr vəd edir?
“Sherg.az” olaraq bu barədə tibb və fəlsəfə elmləri doktoru Şəmsiyyə Namazova ilə söhbətləşdik:
- Yoluxma faktının artmasını nə ilə əlaqələndirirsiniz?
- Əslində bu, gözlənilən idi. Çünki insanlar pandemiyanın ilk dövrlərindən fərqli olaraq indi məsuliyyətsiz davranırlar. Taksi sürücüləri tibbi maska taxmır, adamlar aralarında sosial məsafə saxlamırlar. Belə olan halda yoluxma sayının artması, əlbəttə, təəccüblü deyil. İlk vaxtlardan deyirəm ki, koronavirusla mübarizə üçün cərimələnmə lazımdır. Görünür, maariflənmə işə yaramır.
- Növbəti qapanma ehtimalı barədə fikirləriniz necədir?
- Vaksinləşmənin sürətlə getdiyinə görə qapanmanın olacağına inanmıram. Çünki bu, həm də iqtisadiyyata zərbədir. Cüzi məhdudiyyətlər isə istisna deyil. Əsas məsələ indi ümid yerimizin olmasıdır. Bu, peyvənddir.
- Artıq üçüncü dozanın vurulması gündəmə gəlib. Sizcə, bu, nə qədər məqsədəuyğundur?
- Antitelin orqanizmdə qalma müddəti altı aydır. İkinci dozanın üzərindən yarım il keçibsə, üçüncünün vurulması lazımdır. Xüsusilə nəzərə almalıyıq ki, yoluxma və ölüm faktı heç də az deyil. Yalnız bir halda vaksinin növbəti dozası ertələnə bilər.
- Nə vaxt?
- Ola bilsin, şəxs birinci və ya ikinci dozanı vurdurandan sonra koronavirusa yoluxub. Bu zaman orqanizmdə təbii antitel yaranır və növbəti doza üçün daha altı ay gözləmək lazım gəlir. Yeri gəlmişkən, deyim ki, peyvənd vurduranların müntəzəm olaraq antitellərini yoxlatması çox yaxşı haldır.
- Deməli, vaksin olunanlar da yoluxa bilir?
- Əlbəttə. Peyvənd xəstəliyin qarşısını almır, sadəcə ağırlaşmaya imkan vermir. Təsadüfi deyil ki, vaksinləşən, amma yoluxan şəxslərdə adətən tromblaşma kimi hallar olmur. Orqanizm özü xəstəliklə mübarizə apara bilir. Pandemiya hələ davam edir. Çıxış yollarımız isə məlumdur və başqa alternativimiz yoxdur.
