Rusiyanın paytaxtı Moskvanın Qorki parkında hamilə qadınlar və yeni uşaq dünyaya gətirmiş analar üçün maraqlı yoqa təcrübəsi təklif olunur. Keçilərlə yoqa seanslarına böyük maraq var. 30 nəfərlik qruplar üçün min nəfərlik növbə var.
Sherg.az xəbər verir ki, yoqa döşəklərinin ətrafında dolaşan keçilər iştirakçılar üçün sessiyanın vacib hissəsidir.
Yoqa ilə məşğul olanlar keçilərə yaxınlaşa, onları əzizləyib, bəsləyə bilərlər. Bu tədbirlər analara həm rahatlıq, həm də keçilərlə və təbiətlə təmasda olmaq imkanı verir.
Qorki parkında hər cümə axşamı keçilərlə yoqa seanslarının keçirilməsi planlaşdırılır.
Maraqlıdır, yoqanın hamilə qadınlara və yeni analara hansı təsiri var? Belə olduqda əsasən yoqa neçə seans tətbiq edilir? Hansı vasitələrdən istifadə olunur?
Suallarımızı cavablandıran yoqa üzrə mütəxəssis Günel Qaraxanova "Sherg.az" a açıqlamasında deyib ki, hamilə qadınlar üçün yoqa praktikası bir qədər fərqli və individualdır:
''Belə ki, əvvəlcə qadının neçə aylıq hamilə olduğu nəzərə alınır, Bədəninin daha çox hansı nahiyyələrində ağrı olduğu soruşulur. Həmçinin həkimin icazəsi olub-olmadığı araşdırılır. Bir sözlə, bu prossesdən sonra, yoqa dərslərinə başlanılır. Qeyd edim ki, ilk yaranan, klassik yoqa xatxadır. Asanalar isə müalicə hesab olunur. Sonradan yaranan müxtəlif yoqa növləri var. Onurğada skolyoz, ostexondroz, qrija olduqda həkimlər xatxa yoqanı məsləhət bilir. Həmçinin, xatxa yoqanın ansanalarından hamilələrə tətbiq olunur. Qeyd edim ki, bədəndəki xəstəliklərin hamısı şüurumuzda başlayır. Çünki bütün daxili orqanlarımızın açarı beynimizdə yerləşir. İnsanın psixoloji, mental vəziyyəti yaxşı olmadıqda daxili orqanlar özəlliklə mədə-bağırsaq işləmə qabiliyyətini itirir. Burada ən böyük səbəb stressdir və bu da yuxusuzluğa səbəb olur. Yuxusuzluq da panik ataka gətirib çıxarır. Ona görə də beynimizi rahatlatmalıyıq. Daha sonra yoqa asanaları keçməliyik. Lakin yoqa asanalarından öncə, meditasya və pranayamalar edilir. Bunlar isə düzgün nəfəs texnikalarıdır''.
Mütəxəssis vurğulayıb ki, yoqada yaş məhdudiyyəti yoxdur :
''Hətta, 3 yaşda belə, anasına baxaraq hərəkəti təkrarlayan uşaqlar var. Sözügedən yoqada elə asanalar var ki,çətindir və birbaşa beyinlə kontakt istəyir. Bəzi tələbələrim söyləyirlər ki, dərsboyu heç nə barədə fikirləşmirlər. İnsanlar 1 ayın sonunda tam nəticə əldə edirlər. Çünki əksəriyyətinin əzələləri boylarına görə qısadır.Buna görə də qan dövranı yaxşı işləmir, təzyiq xəstəliyi yaranır".
