"İki ölkə bir sıra mühüm beynəlxalq və regional məsələlərdə eyni mövqedən çıxış edir"
"Azərbaycan və Macarıstan arasında münasibətlər son illərdə strateji əməkdaşlıq səviyyəsinə yüksəlib".
Bunu Milli Məclisin üzvü Şahin Seyidzadə "Sherg.az"a açıqlamasında deyib.
Deputat bildirib ki, Azərbaycan Prezidentinin Macarıstana rəsmi səfəri bu münasibətlərin möhkəmləndirilməsi və yeni sahələrdə əməkdaşlığın genişləndirilməsi baxımından mühüm əhəmiyyət kəsb edir:
"Səfər çərçivəsində aparılan danışıqlar göstərdi ki, iki ölkə bir sıra mühüm beynəlxalq və regional məsələlərdə eyni mövqedən çıxış edir. Azərbaycan və Macarıstanı birləşdirən yalnız bugünki iqtisadi maraqlar deyil, həm də ortaq tarixi köklər, mədəni yaxınlıq və siyasi dəyərlərdir. Azərbaycanın İkinci Qarabağ müharibəsində əldə etdiyi qələbə beynəlxalq hüquqa əsaslanaraq – BMT-nin Nizamnaməsinin 51-ci maddəsi çərçivəsində həyata keçirilmişdir. Azərbaycanın öz ərazi bütövlüyünü bərpa etməsi regional sabitlik üçün əhəmiyyətli addım olub. Müharibədən sonra isə sülh təşəbbüslərinin müəllifi də məhz Azərbaycan olub. Ermənistan bu təşəbbüslərə müəyyən düzəlişlərlə razılaşsa da, Konstitusiyasında Azərbaycana qarşı ərazi iddialarını saxlaması sülh prosesini ləngidir. Azərbaycan tərəfi isə bu iddiaların ləğvini və Minsk qrupunun formal olaraq da aradan qaldırılmasını sülh müqaviləsinin əsas şərti kimi təqdim edir. Əməkdaşlığın mühüm sahələrindən biri energetikadır. Macarıstan şirkətləri Azərbaycanın iri enerji layihələrində - “Azəri-Çıraq-Günəşli” və “Şahdəniz”də pay sahibidir".
Parlamentari qeyd edib ki, artıq Azərbaycan Macarıstana təbii qaz ixrac etməyə başlayıb və gələcəkdə bu əməkdaşlıq daha da genişləndiriləcək:
"Azərbaycanın geniş qaz ehtiyatları və yaşıl enerji planları Avropanın enerji təhlükəsizliyində mühüm rol oynayır. Bu istiqamətdə əməkdaşlıq təkcə iqtisadi deyil, həm də strateji əhəmiyyət daşıyır. Macarıstanın Türk Dövlətləri Təşkilatı çərçivəsində fəal iştirakı da onu göstərir ki, bu ölkə türk dünyası ilə daha sıx inteqrasiyaya maraqlıdır. Macarıstanın təşəbbüsü ilə keçirilən qeyri-rəsmi Zirvə görüşü, təşkilatın vahidliyini və gələcək əməkdaşlıq imkanlarını gücləndirir. Macarıstanın Avropa İttifaqı daxilində belə müstəqil siyasət aparması və milli maraqları üstün tutması, Azərbaycan tərəfindən yüksək dəyərləndirilir. Bütün bu məqamlar iki ölkə arasında olan münasibətlərin gələcəkdə daha da dərinləşəcəyinə işarədir. Bu səfər Azərbaycan-Macarıstan münasibətlərininyeni mərhələyə qədəm qoyduğunu və strateji tərəfdaşlığın daha da gücləndiyini göstərir. İki ölkə arasında qarşılıqlı hörmətə və etimada əsaslanan bu əməkdaşlıq, regional və qlobal səviyyədə sülhə və sabitliyə töhfə verəcək".
