“Bir neçə milyard daha çox insan yaşayır”
Birləşmiş Millətlər Təşkilatı (BMT), ötən yay etibarilə Yer kürəsində təxminən 8,2 milyard insanın yaşadığını açıqlamışdı. Lakin son bir araşdırma dünyadakı real insan sayının bundan daha çox ola biləcəyini ortaya qoyur.
Sherg.az xəbər verir ki, Finlandiyanın Aalto Universitetində doktorantura sonrası tədqiqatçı olan Josias Láng-Ritter və həmkarları, dünya əhalisi hesablanarkən səhvlərə yol verildiyini, xüsusilə kənd yerlərindəki məlumatların əskik olduğunu bildiriblər.
Tədqiqatçılar, istifadə olunan məlumat dəstələri arasında böyük uyğunsuzluqlar müəyyən ediblər. Bu da o deməkdir ki, kənd əhalisi, hətta ən etibarlı məlumatlarda belə, real sayından iki dəfə az göstərilib.
“Nature” adlı nüfuzlu elmi jurnalda yayımlanan araşdırma məqaləsində BMT-nin kənd yerlərində yaşayan insanların sayını ən az 50 faiz əskik hesabladığı qeyd olunur.
Bu nəticəyə görə, dünya əhalisi əvvəldən düşünüləndən yüz milyonlarla və ya hətta bir neçə milyard daha çox ola bilər.
Londondakı Queen Mary Universitetindən professor Jonathan Kennedy, “The Guardian” üçün yazdığı məqalədə bu tapıntıları şərh edib. Onun fikrincə, dünyada düşündüyümüzdən daha çox insanın yaşaması, planetin məhdud resurslarını nəzərə alsaq, narahatedici görünə bilər. Ancaq bu, eyni zamanda müsbət də sayıla bilər.
Kennedy qeyd edib ki, "həddindən artıq əhali" məsələsindəki narahatlıqlar çox vaxt şişirdilir. BMT-nin proqnozlarına görə, dünya əhalisi 2080-ci illərin ortalarında zirvəyə çatacaq və oradan sonra azalmağa başlayacaq. Bu da bir çox mütəxəssisi əhalinin azalmasının doğuracağı problemlər barədə düşünməyə vadar edir.
Professor yazıb:
“Bu qədər çox insan Yer kürəsinin resurslarına böyük yük ola bilər. Lakin əgər istehlak məsuliyyətlə idarə olunarsa və dayanıqlı texnologiyalar inkişaf etdirilərsə, dünya böyük bir fəlakətdən yayına bilər.”
