ABŞ Prezidenti Donald Tramp növbəti dəfə iş adamı İlon Maskı “dəli” adlandırıb.
Teleqraf xəbər verir ki, ABŞ lideri ABC telekanalına müsahibəsində onunla görüşməkdə maraqlı olmadığını bildirib.
“Dəli oğlanı nəzərdə tutursunuz? Hazırda onunla danışmaq xüsusilə maraqlı deyil”, - Tramp jurnalistin müvafiq sualına cavabında deyib.
ABŞ Prezidenti həmçinin bildirib ki, onunla danışmaq istəyən Mask olub, amma o, iş adamı ilə danışmağa hazır deyil.
Bundan əvvəl ABŞ KİV-də münasibətləri pozulan İlon Mask və Donald Trampın bu gün görüşəcəyi barədə məlumat yaymışdı.
Xatırladaq ki, Mask Trampın vergi qanunu layihəsini tənqid etdikdən sonra onların münasibətləri pisləşib. Tramp jurnalistlərə Maskdan məyus olduğunu söyləyərək, ardınca sosial media hesabında onu “dəli” adlandırıb.
Mask cavabında Trampın “Epşteyn dosyesi”ndə (pedofiliya və fahişəliyin təşkilində ittiham olunan maliyyəçi) adı keçən bir fiqur olduğuna işarə edib. Milyarder həmçinin Trampın impiçmenti ideyasını da dəstəkləyib.
İlon Mask bu ilin yanvarında Donald Tramp tərəfindən ABŞ Hökumətinin Effektivliyi Departamentinin (DOGE) rəhbəri təyin olunmuşdu. Prezidentlə münasibətləri pisləşdikdən sonra o, mayın 29-da vəzifəsindən istefa verdi.
