“Allahım Neydi Günahım”, “Odalarda Işıksızım”, “Yemin Ettim” və “Geceler” kimi unudulmaz mahnıları ilə tanınan Kayahan ölümünün 10-cu ildönümündə xüsusi konsertlə yad ediləcək. Konsert 25 iyun Çərşənbə günü Atatürk Mədəniyyət Mərkəzində baş tutacaq. Kayahanın qızı Beste Açar və dostları onun məşhur mahnılarını səsləndirəcəklər.
Sherg.az xəbər verir ki, konsertdə “Her şeyden Çok”, “Sarı Saçlarından Sen Suçlusun”, “Beni Anlamadın ya”, “Gönül Sayfam”, “Yemin Ettim” və “Esmer Günler” kimi əsərlər ifa ediləcək.
Kayahan 1990-cı ildən yumşaq toxuma xərçəngi ilə mübarizə aparıb, 2014-cü ildə xəstəlik yenidən baş qaldırıb. 3 aprel 2015-ci ildə kiçik hüceyrəli ağciyər xərçəngindən vəfat edib. Vasiyyətinə əsasən Kanlıca Mihrimah Sultan qəbiristanlığında dəfn olunub.
Bir müsahibəsində sənətçi demişdi:
“Ölüm cəza deyil, məncə, məzuniyyətdir. Allahın hüzuruna çıxıb hesabat verəcəksiniz. Dünyanın yalan olduğunu dərk etsəniz, rahatlıq taparsınız.”
2014-cü ildə Tarkan, Sezen Aksu, Funda Arar və Nilüfer də daxil olmaqla bir çox məşhur sənətçi "Kayahanın En İyileri" adlı albomda bir araya gəliblər.
