OCCPR-nin (Mütəşəkkil Cinayətkarlıq və Korrupsiya Araşdırmaları Layihəsi) ABŞ-a bağlı olduğu, “jurnalistika” adı altında ölkələrin daxili işlərinə qarışmaq və təzyiq etmək üçün istifadə edildiyi bəlli idi. Xarici mediada yayımlanan araşdırmalarda bu fakt çılpaqlığı ilə ortaya çıxdı. “Dropsitenews.com” resursunda “Jurnalistika nəhəngi büdcəsinin yarısını ABŞ hökumətindən alır” başlıqlı məqalə dərc olunub. Ryan Grim, Ştefan Candea və Nikolas Leontopoulosun müllifi olduğu məqalədə OCCPR-nin mənsubluğu, maliyyə mənbələri, əsl məqsəd və məramını ifşa edilir. İndiyə qədər OCCRP-nin büdcəsi Avropa İttifaqı, Avropa ölkələri, xüsusilə ABŞ-dan aldığı vəsait hesabına formalaşdırılıb. Bu araşdırmalar təsdiq edir ki, OCCPR-nin Azərbaycanla bağlı apardığı “araşdırmalar” yalan məlumatlara əsaslanıb və şantaj məqsədi daşıyıb. Hədəf Azərbaycana təzyiq etmək və ABŞ-ın maraqlarının təmin edilməsinə nail olmaq olub. OCCPR-nin Azərbaycanla bağlı araşdırmalarının altındakı əsas imza Xədicə İsmayıl olub. “Dropsitenews.com” və “Mediapart” araşdırmaları ilə bağlı Xədicə İsmayıla sual ünvanladıq. Bu faktlardan sonra özünü “müstəqil jurnalist” hesab edən X.İsmayıl etiraf etməsə belə, gerçəkləri qəbul etməsi gözlənilən idi. Lakin o, heç bir tutarlı əsas gətirmədi. Ümumi sözlərlə özünü müdafiə etməyə çalışdı. OCCPR-nin Cənubi Qafqaz siyasəti, bu xüsusda Azərbaycanı əsas hədəf kimi seçməsi, daxili işlərə qarışmaq və əsasən erməni maraqlarının müdafiəçisi kimi çıxış etməsi qəbuledilməzdir.
Siyasi şərhçi Asif Nərimanlı “Sherg.az”a söyləyib ki, bu təşkilatın əsas hədəf seçdiyi ölkələrdən birinin Azərbaycan olduğu əvvəldən bəlli idi:
“Fransa, İtaliya, Almaniya, Yunanıstan mediasında aparılan araşdırmalar göstərdi ki, həqiqətən həmin təşkilat Amerika tərəfindən maliyyələşir. İndiyə qədər Azərbaycan mediasında bununla bağlı araşdırmalar aparılmış və faktlar ortaya çıxmışdı. Ancaq Qərb mediasının özünün apardığı geniş araşdırma həmin faktları bur daha sübuta yetirdi. OCCPR təşkilatın Azərbaycan üzərinə bu qədər hücum etməsi hər zaman maraq doğuran məsələdir. Əksər ölkələrin içində Azərbaycan əleyhinə kampaniyalar daha çox diqqət çəkir və bu xətt davamlı olaraq görünür. Bu təkcə Amerikanın Azərbaycana təcrid siyasətindən qaynaqlanmır, eyni zamanda erməni lobbisinin fəaliyyəti istisna edilməməlidir. OCCPR təşkilatının bağlı olduğu yer USAİD-dir. USAİD Amerika Dövlət Departamentinin və Amerika kəşfiyyatının bir qanadı kimi fəaliyyət göstərir. USAİD-in rəhbəri Samanta Pauerin kim olduğunu hər kəs yaxşı bilir. Samanta Pauer ermənilərin açıq müdafiəçisidir və qondarma soyqrımlara nəzarət edib. Həmçinin Bakıda olan seperatçılardan Ruben Vardanyanla çox yaxın əlaqələrə malikdir. Görünən odur ki, erməni lobbisi uzun illər sözügüdən təşkilat üzərindən Azərbaycana təzyiq etməyə çalışıb. Həmin prosesdə daxilindən olan azərbaycanlı jurnalistlər də var idi. Tarixi faktlar ortaya çıxdıqca həmin jurnalistlərin müstəqil şəkildə fəaliyyət göstərmələrinin yalan olduğu da təsdiqləndi”.
