Bir müddət əvvəl elə təəssürat yarana bilərdi ki, Azərbaycanın Avropa İttifaqı ilə əlaqələri zəifləyir. Aİ-nin əvvəlki rəhbərliyi dövründə ölkəmizə qarşı müəyyən haqsız yanaşmalar müşahidə olunurdu. Lakin Azərbaycanın prinsipial və qətiyyətli mövqeyi bu ədalətsiz yanaşmaların aradan qaldırılmasına səbəb oldu.
Bu gün Azərbaycan ilə Avropa İttifaqı arasında siyasi münasibətlər tam şəkildə bərpa olunub və sağlam məcrada inkişaf edir. Ermənistan isə Aİ ilə əlaqələrində regionda özünə xüsusi və üstün mövqe qazandırmağa, ayırıcı xətlər çəkməyə çalışırdı. Bu cəhdləri dəstəkləyən dairələr də mövcud idi. Lakin Prezident İlham Əliyevin qətiyyətli siyasəti nəticəsində bu cür meyllər neytrallaşdırıldı və əməkdaşlıq platformasında balans bərpa olundu.
Politoloq Tural İrfan Sherg.az-a deyib ki, Azərbaycanın qətiyyətli mövqeyi və dövlət başçısının prinsipial, müdrik siyasəti hər zaman dövlətimizə qarşı münasibətlərin müsbət mənada dəyişməsinə səbəb olub:
"Təbii ki, Azərbaycanın istər bölgədə, istər dünyada artan nüfuzu, qüdrəti bir çox Qərb dövlətlərini yaxud dairələrini narahat edir. Aİ müəyyən vaxtlarda müxtəlif yollarla Azərbaycana qarşı haqsız münasibətlər sərgiləyirdi. Ancaq hazırda Aİ ilə Azərbaycan arasında münasibətlərin arzuedilən həddə inkişaf etdiyinin şahidi oluruq.
Bəzi ədalətsiz yanaşmalarının olması bu ittifaqın nəzərinə çatdırıldı və qəti və qaçılmaz mövqeyimiz qarşısında razılaşmamağa yer saxlamadı. Ermənistan Avropa İttifaqı ilə xüsusi bir imtiyaz əldə etmək və bölgədə özünə üstünlük əldə etmək istəyirdi. Şübhəsiz ki, Ermənistanı Fransa kimi dövlətlər və müxtəlif dairələr dəstəkləyirdi. Buna baxmayaraq, Azərbaycan dövlət başçısının apardığı səmərəli siyasət sayəsində Ermənistan dəf olundu və Aİ da neytallaşdı. Əməkdaşlıq platformasındakı balasın bərpa olunması Azərbaycanın qarşıda duran vəzifələrdə, məsələlərdə mövqeyini daha gücləndirdi. Əsasən Ermənistanın Rusiya ilə Avropa arasında bəzən ikili standartlarla hərəkət etməsi, gah o tərəfə gah da bu tərəfə yıxılması onun Aİ-da etimadını zəiflətdi. Azərbaycan tərəfin apardığı xarici siyasət, ələlxüsus Prezident İlham Əliyevin şəxsən bu prosesləri izləməsi və idarə etməsi nəticə olaraq, Aİ ilə də balansın nizama salınmasında əvəzsiz rol oynadı".
Politoloq sonda vurğulayıb ki, siyasi münasibətlərin bərpa olunması, Aİ-nın reallıq və qəti mövqe qarşısında geri çəkilməyə məcbur olması Azərbaycan diplomatiyasının növbəti nailiyyətlərindən sayıla bilər".
