Fuad Şahbazov: Münasibətlərin davamlılığı yalnız iqtisadi maraqlarla deyil, qarşılıqlı hörmət və qeyri-müdaxilə prinsiplərinə əməl olunması ilə mümkündür
Rusiya və Azərbaycan iqtisadi münasibətləri gücləndirir və heç kəs bu əlaqələrin pozulmasında maraqlı deyil.
Bu barədə Rusiya Baş nazirinin müavini Aleksey Overçuk bildirib.
Overçuk deyib ki, Rusiya ilə Azərbaycan arasında iqtisadi əlaqələr inkişaf edir və bu münasibətləri pozmaq heç kimin marağında deyil.
Siyasi şərhçi Fuad Şahbazov Sherg.az-a deyib ki, Rusiya Baş nazirinin müavini Aleksey Overçukun “heç kəs Rusiya-Azərbaycan münasibətlərini pozmaqda maraqlı deyil” fikri, hazırkı geosiyasi və ictimai gərginliyi nəzərə alanda reallıqdan çox arzuolunan bir vəziyyəti ifadə edir:
"Son aylarda Rusiyada azərbaycanlılara qarşı baş vermiş hadisələr – Yekaterinburqda həbs edilən azərbaycanlıların müəmmalı şəkildə ölməsi, kütləvi həbslər və təqiblər, eləcə də millətçi ritorikanın artması münasibətlərə ciddi zərbə vurur. Eyni zamanda, AZAL təyyarəsinə qarşı Rusiyanın hava məkanında sərgilədiyi açıq-aşkar qeyri-dost yanaşma, ikitərəfli əməkdaşlıqdan çox, təzyiq aləti təəssüratı yaradır. Digər tərəfdən, Azərbaycan-Ermənistan sülh prosesinin Rusiya vasitəçiliyindən kənar, birbaşa Qərb platformalarında davam etməsi Kremldə açıq narahatlıq yaradıb. Bu, münasibətlərin siyasi müstəvidə soyumasına səbəb olub. Rusiya daxilində bəzi dairələrin Azərbaycana qarşı yönəlmiş aqressiv ritorikası və təxribatçı media fəaliyyəti də gərginliyi daha da artırır".
Analitik əlavə edib ki, Overçukun dedikləri daha çox ikitərəfli əlaqələrə kosmetik yanaşmanın təzahürüdür:
"Həmçinin onun fikirləri real problemlərin üstündən sükutla keçmək cəhdidir. Münasibətlərin davamlılığı yalnız iqtisadi maraqlarla deyil, qarşılıqlı hörmət və qeyri-müdaxilə prinsiplərinə əməl olunması ilə mümkündür".
