Azərbaycan və Ermənistan arasında sülh müqaviləsinin imzalanması üçün danışıqlar davam edir. 2020-ci ildən sonra bölgədə yaranan yeni vəziyyət iki ölkə arasında münasibətlərin normallaşması üçün imkanlar açıb. Azərbaycan bu prosesin uğurla başa çatması üçün iki əsas şərt irəli sürüb. Bu şərtlərdən biri artıq yerinə yetirilib.
Dünən ABŞ Prezidenti D.Trampın şahidliyi ilə Prezident İlham Əliyev və Baş nazir Nikol Paşinyan arasında Vaşinqton görüşünün nəticəsi olaraq Birgə Bəyannamə imzalandı. Minsk Qrupu artıq fəaliyyətini dayandırdı. Lakin Ermənistan Konstitusiyasında hələ dəyişiklik olunmayıb. Bu məsələ sülh müqaviləsinin imzalanmasında əsas maneə olaraq qalır.
Mövzu ilə bağlı politoloq Zeynal Əmrəliyev Sherg.az-a açıqlama verib:
"Əsas sülh müqaviləsi Ermənistan Konstitusiyasında dəyişiklik edildikdən sonra qəbul ediləcək.
Azərbaycan iki əsas şərt irəli sürüb. Birincisi, Ermənistan Konstitusiyasında dəyişikliklərin edilməsi, ikincisi isə ATƏT-in Minsk Qrupunun ləğv olunması idi. Ermənistan ikinci şərti qəbul etdi. Minsk Qrupu artıq formal olaraq fəaliyyətini dayandırdı.
Lakin hələ də Ermənistan Konstitusiyasında dəyişiklik edilməyib. Ermənistan mediasında yayılan məlumata görə, 2026-cı ildə keçiriləcək parlament seçkiləri ilə eyni vaxtda Konstitusiyaya dəyişikliklə bağlı referendumun keçirilməsi planlaşdırılır. Ehtimal olunur ki, həmin referendumda Azərbaycanın etiraz etdiyi maddələr Konstitusiyadan çıxarıla bilər.
Bu maddələrin Konstitusiyadan çıxarılmasından sonra Azərbaycan və Ermənistan arasında yekun sülh sazişinin imzalanması mümkün ola bilər".
Politoloq hazırkı mərhələdə Ermənistan Konstitusiyasında həmin maddələrin mövcudluğu səbəbindən belə bir sənədin imzalanmasının real görünmədiyini söyləyib:
"Sabah Ermənistanda revanşist qüvvələrin yenidən hüquqi baza yaradaraq sülh sazişini pozmağa cəhd göstərməsi ehtimalı istisna edilmir.
Azərbaycan üçün əsas məqsəd tələsik deyil, dayanıqlı və uzunmüddətli sülhün təmin olunmasıdır. Rəsmi Bakı bu məsələdə ilk gündən prinsipial mövqe nümayiş etdirib. Son hadisələr də göstərdi ki, Azərbaycan dövləti bu mövqedə haqlıdır və sonadək öz prinsipiallığını qoruyur.
Artıq sülh sazişi paraflanıb. Gözlənilir ki, Ermənistan yaxın vaxtlarda referendum keçirərək mübahisəli maddələri Konstitusiyadan çıxarsın. Bu addımdan sonra Azərbaycan-Ermənistan arasında yekun sülh müqaviləsinin imzalanması real görünür. Hazırda yeganə açıq qalan məsələ də məhz budur. Digər bütün məsələlər demək olar ki, öz həllini tapıb".
