ABŞ Dövlət katibi Blinken münasibətlərin normallaşdırılması məqsədilə dekabrda ABŞ Dövlət katibinin köməkçisi Ceyms Obrayenin Azərbaycana səfərinə icazə verilməsini xahiş edib.
Bu barədə Dövlət katibi Blinken Azərbaycan Prezidenti İlham Əliyevlə telefon söhbəti zamanı deyib.
Prezident İlham Əliyev həmin təkliflə bir şərtlə razılaşıb ki, bu səfərdən sonra Azərbaycanın yüksək səviyyəli rəsmilərinin ABŞ-a səfərlərinə qoyulan əsassız qadağa aradan qaldırılsın.
Dövlət katibi Blinken bunu qəbul edib.
Məsələ ilə bağlı "Sherg.az"a danışan siyasi şərhçi Turab Rzayev söyləyib ki, ABŞ Azərbaycan ilə münasibətlərini normallaşdırmaq niyyətindədir:
"Bunun üçün isə Amerikanın bir neçə səbəbi var. Birincisi ondan ibarətdir ki, ABŞ həm Cənubi Qafqazda, həm də Mərkəzi Asiyada güclənmək istəyir. Eyni zamanda Rusiyaya qarşı öz təsir dairəsini artırmağa çalışır. Ancaq Cənubi Qafqazın əhali sayına, ərazisinə və iqtisadi gücünə görə ən böyük ölkəsi Azərbaycandır. Ona görə də Azərbaycan olmadan ABŞ-nin Qafqazda güclənməsi çətindir. Belə olan halda isə ABŞ Azərbaycan ilə münasibətləri bərpa etməyə niyyətlidir. Eyni zamanda yüksək rütbəli ABŞ nümayəndələri çox zaman ciddi təkliflər irəli sürürlər. Bu baxımdan ABŞ istəyir ki, Amerika rəsmiləri Azərbaycanın yüksək rütbəli şəxsləri ilə xüsusi məsələləri müzakirə etsinlər. Azərbaycan isə buna qarşı öz şərtini irəli sürüb. Çünki indiyə qədər ABŞ Azərbaycanın yüksək rütbəli rəsmilərinin ölkəyə səfərinə icazə vermirdi. Bu isə istər-istəməz Azərbaycanda narazılıq doğururdu. Entoni Blinkenin Cənubi Qafqazla bağlı planları, o qədər ciddidir ki, bu səfər üçün həmin şərti qəbul ediblər və indiyə kimi tutduqları mövqedən əl çəkiblər. Eyni zamanda ABŞ-nin Cənubi Qafqazda sülh istəməsi bəlli olur. Amerika düşünür ki, sülh baş tutsa, o, Ermənistanda möhkəmlənə və Rusiyanı oradan çıxara bilər. Əks halda ABŞ-nin Cənubi Qafqazda möhkəmlənməsi və Ermənistanı öz tərəfinə çəkməsi mümkün olmayacaq. Eyni zamanda ABŞ əmin olmalıdır ki, Ermənistana problem yaranmayacaq. Çünki Rusiya Nikol Paşinyan hakimiyyətini devirmək üçün ona qarşı ciddi düşmənçilik addımları ata bilər".
