“Niyə 30 il ərzində Azərbaycanın işğal altında olan torpaqlarına gəlib, mövcud durumla maraqlanmırdılar?!
“İndi isə 5-10 min erməni yadlarına düşüb. Bu, ikili standartlardan xəbər verir”
“Azərbaycan ortaya mövqe qoymalıdır ki, həmin nümayəndələr gəlib qaçqın düşərgələri və şəhərciklərdə vətəndaşlarımızla görüşsünlər”
BMT rəhbərliyi kompleks qiymətləndirmə missiyasını Qarabağ münaqişəsi zonasına göndərmək haqqında qərar verib. Bu barədə Rusiya Xarici İşlər Nazirliyinin (XİN) rəsmi nümayəndəsi Mariya Zaxarova bu gün keçirdiyi brifinqdə bildirib. Onun sözlərinə görə, missiyanın tərkibində yerlərdə vəziyyətlə tanış olmaq və köməyə ehtiyacı olanların tələbatlarını qiymətləndirmək üçün profil humanitar agentliklərin nümayəndələri olacaq:
“Hazırda məlum qiymətləndirmə missiyasının parametrlərinin hazırlanması və razılaşdırılması davam edir. Biz öz tərəfimizdən hesab edirik ki, bütün zərərçəkənlərə profil beynəlxalq təşkilatların xətti ilə humanitar yardımların göstərilməsi faydalıdır”.
M. Zaxarova Rusiya tərəfinin Dağlıq Qarabağla bağlı üçtərəfli bəyanatdan dərhal sonra bu işə başladığını xatırladıb:
“Biz regiona UNESCO-nun müstəqil texniki missiyasının göndərilməsinə hazırıq. Ondan çıxış edirik ki, UNESCO-nun tərəfdaş beynəlxalq qeyri-hökumət təşkilatlarından ibarət humanitar missiyası kollektiv səylərlə Dağlıq Qarabağ regionunun mədəni obyektlərinin vəziyyətinə obyektv qiymət verə bilər”.
Baş verənləri “Sherg.az”a dəyərləndirən politoloq Əhəd Məmmədli bildirib ki, nə üçün BMT-nin rəsmi nümayəndələri 30 il ərzində Azərbaycanın işğal altında olan torpaqlarına gəlib, mövcud durumla maraqlanmırdılar? Çoxlu sayda qaçqın və məcburi köçkünlərimiz var idi. Amma BMT nümayəndələri vətəndaşlarımızın hər hansı bir ehtiyacının olub-olmamasına əhəmiyyət verməyiblər:
“İndi isə yadlarına 5-10 min erməni düşüb. Bu, ikili standartlardan xəbər verir. Təbii ki, belə olan halda Azərbaycan tərəfi də ortaya mövqe qoymalıdır ki, həmin nümayəndələr gəlib qaçqın düşərgələri və şəhərciklərdə vətəndaşlarımızla görüşsünlər.
Yoxsa bu, BMT tərəfindən birtərəfli və qərəzli mövqe kimi qiymətləndirilir”.
