3+3 formatına qoşulmağı nəzərdən keçirmirik.
APA xəbər verir ki, bunu Antalya Diplomatiya Forumu çərçivəsində "Cənubi Qafqazda regional əməkdaşlıq üçün çağırışlar və imkanlar" mövzusunda panel müzakirəsində Gürcüstanın xarici işlər naziri Maka Boçorişvili deyib.
“Gürcüstan bu formatın üzvü olmasa da, bu format hər zaman 3+3 adlandırılır. Gürcüstan bu formatın üzvü deyil. Biz bütün qonşularla əməkdaşlıq edirik. Bunun da səbəbi var, lakin Rusiya istisna olmaqla. Bunun da səbəbi var. Çünki Gürcüstanın iki regionu Rusiyanın işğalı altında qalır. Bu iki regionda hələ də Rusiyanın hərbi mövcudluğu var. Buna görə də biz bu formatda iştirakı nəzərdən keçirmirik. Bizim Rusiya Federasiyası ilə yalnız bir formatımız var ki, bu da Cenevrə Beynəlxalq Müzakirələridir. Burada Gürcüstan və Rusiya münaqişə ilə bağlı müzakirə aparırlar və ABŞ, BMT, ATƏT, Aİ təmsil olunur. Münaqişə ilə bağlı məsələlərin müzakirəsinə imkan verən bu format bizim üçün dəyərli bir formatdır. Digər qonşularla əməkdaşlığa gəldikdə isə, bizim əla əməkdaşlığımız var – Azərbaycanla, Ermənistanla və Türkiyə ilə. Bizim bu əməkdaşlığa dair gözəl nümunələrimiz var. Türkiyə və Azərbaycanla biz onilliklər boyunca vacib layihələr həyata keçirmişik. Bu layihələr yalnız kiçik regionda deyil, daha geniş regionda vacib layihələrdir”, - deyə Boçorişvili əlavə edib.
