Bakı-Vaşinqton arasında gərginlik müşahidə olunmur
ABŞ iyulun 15-24-də Ermənistanla növbəti birgə "Eagle Partner 2024" təliminə hazırlaşır. Rusiyalı hərbi analitik Vladimir Yevseyevin sözlərinə görə, bu xəbər böyük ehtimalla Moskvada heç kimi təəccübləndirməyib, xüsusən də bu cür hərbi təlimlərin Ermənistan-ABŞ formatında keçirilməsi ilk dəfə deyil. O qeyd edib ki, bu, hərbi qulluqçulara çox spesifik bacarıqlar verən o qədər də ciddi təlimlər deyil. Ekspert hesab edir ki, Qərb modelləri, xüsusən də ABŞ modelləri ilə tanışlıq oxşar hərbi təlimlər vasitəsilə baş verir. Yevseyev bildirib ki, bunların böyük geosiyasi mənası və məzmunu var: “ABŞ təbii ki, Ermənistanın bu regionda onun tərəfdaşı olduğunu göstərməyə çalışır. Ermənistanla bağlı məsələdə təbii olaraq maraqlısı odur ki, KTMT üzvü olan ölkə ABŞ ilə hərbi təlimlər keçirir, ABŞ isə Ukrayna müharibəsində əsas KTMT üzvü olan Rusiyaya rəqibdir”.
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov bildirib ki, ABŞ Ermənistan hökumətinə və cəmiyyətinə mesaj verir ki, Ağ Ev yanınızdadır. Həmçinin Moskvaya mesaj verir ki, regionda Rusiyanı əvəzləyəcək:
"Yəni ABŞ-Ermənistan hərbi təlimləri Bakını yox, Moskva və Tehranı narahat edir. Buna görə də hər iki ölkədən bununla bağlı narazılıqlar gündəmə gətirilir. Azərbaycan-Ermənistan arasında sülh müzakirələri davam etdirilir. Müəyyən məsələlərdə irəliləyiş var, sərhədlərin delimitasiya və demarkasiya prosesi dayanmayıb. Azərbaycanı təlimlə bağlı narahat edəcək məqamlar yoxdur. Xarici işlər naziri Ceyhun Bayramovun ABŞ-yə səfəri və NATO sammitində iştirakı da göstərir ki, Bakı-Vaşinqton əlaqələrində gərginlik azalıb. Məncə, "Eagle Partner 2024" təlimləri birbaşa qonşu Rusiya və İrana mesajdır. ABŞ bu mesajı verməklə demək istəyir ki, Vaşinqton olmadan bölgədə Ermənistanla dil tapmaq imkansızdır".
