“Bu ili tariximizin ən şərəfli və uğurlu illərindən sayılır. Ümumiyyətlə, 2024-cü il Azərbaycan üçün müstəqillik illərinin ən uğurlu illərindən biri kimi qeyd olunmalıdır”.
Bu fikirləri “Sherg.az”a açıqlamasında AĞ Partiya funksioneri, siyasi şərhçi Cavanşir Abbaslı bildirib.
O, qeyd edib ki, ilin sonunda təyyarə qəzası kimi faciə yaşadıq:
“Amma bu, bu ildəki tarixi uğurlarımızı bir an da kölgəyə salmamalıdır. 2020-ci ildə biz necə mümkünsüz görünən Qarabağ münaqişəsini həll etdiksə, bu il də mümkünsüz görünən bəzi məsələləri həll olundu. Əvvəlcə rus qoşunlarını ərazilərimizdən çıxardıq, ardınca da Qazaxın 4 kəndini geri qaytardıq. Bütün bunlar Ali Baş Komandan İlham Əliyevin siyasi iradəsi ilə həyata keçirildi. Bir güllə atmadan tarixi torpaqları geri qaytarmaq bir ölkənin xarici siyasətininin nə qədər yüksək və uğurlu olduğunun göstəricisidir. Burada təbii ki, xalqımızın qəhrəmanlığını və milli məsələlərdəki birliyini, qətiyyətini də xüsusi vurğulamalıyıq. 2023-cü il 19-20 sentyabrdakı antiterror əməliyyatı ilə möcüzəyə bərabər bir şəkildə azad etdiyimiz Xankəndi uğurunun da birbaşa memarı Azərbaycan prezidentidir. Əvvəl biz o yerləri yuxumuzda görürdük. İndi o yerlərdə Azərbaycan insanının ayaq səsləri eşidilir. Bunlar İlham Əliyev qətiyyəti sayəsində reallaşıb. Biz müxalifət partiyasıyıq, amma milli məsələlərdə İlham Əliyevin siyasətini tam şəkildə dəstəkləyirik, hər zaman da bu siyasətdə onun yanında olduğumuzu bəyan etmişik".
Partiya funksioneri Ermənistan tərəfdə hələ də qalan Azərbaycan kəndlərinin da tez bir zamanda azad olunacağına ümidlidir:
"İlham Əliyev düşməndə bir qarış torpağımızın belə qalmayacağını dəfələrlə bəyan edib. Artıq dünyada onun bu qətiyyəti ilə hər kəs hesablaşır.
İndi düşməndə qalıb 4 kəndimiz- Qazaxın Yuxarı Əskipara, Bərxudarlı, Sofulu və Naxçıvanın Sədərək rayonunun Kərki kəndi. Tezliklə o kəndlər də qaytarılacaq. Buna əmin ola bilərik. Çünki, Ali Baş Komandan torpaq məsələsində qətiyyətli və güzəştsizdir. Milli məsələlərdə biz ona sonuna qədər inanmalıyıq və xalq olaraq dəstək verməliyik. Bu fikirlərimə görə bəlkə də bəzi fürsətcilər iş başına keçəcəklər. Qoyun keçsinlər. Biz doğru məsələlərdə, xüsusilə milli məsələlərdə doğrunun və qətiyyətin, iradənin yanındayıq. Son 4 ildə ancaq milli məsələlərdə uğur qazanırıq. Üzümüzə gələn ilə də buna inanaq. Artıq 2025-ci ili Azərbaycan prezidenti Konstitusiya və Suverenlik ili elan etdi. Bu da suverenlik məsələsində Azərbaycanın bu il də nə qədər hədəflərinin olduğunu göstərir. Bu hədəflərin içərisində isə, Ermənistanda qalan 4 kəndimizin azad olunması və Qərbi Azərbaycana qayıdış məsələsinin reallaşması mütləqdir. İnşallah, o hədəflərimizin hər biri real olacaq".
