“Ölkə başçısı Azərbaycanla Türkiyənin qardaş ölkələr olduğunu təkcə yunan səfirə deyil, bütövlükdə hər kəsə bəyan etdi”
“Bu, sıradan çıxış deyildi və tarixdə böyük qətiyyət və siyasi iradə nümunəsi və nümayişi kimi qalacaq”
“Bir-birinə qardaş deyən ölkələrin liderləri həlledici məqamlarda bu cür prinsipial mövqe sərgiləməlidirlər"
“Yunanıstanın işğalçı Ermənistanla əməkdaşlıq etməsi açıq mətnlə səfirin diqqətinə çatdırıldı”.
Bu barədə “Sherg.az”a açıqlamasında Milli Həmrəylik Partiyasının (MHP) sədri Əlisahib Hüseynov deyib.
Partiya rəhbəri bildirib ki, Prezidentin “Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik” fikrini tam əminliklə ilin cümləsi hesab etmək olar:
“Prezident çıxışında abstrakt ifadələri və süni diplomatik nəzakət tonunu bir kənara qoyub məlum ölkənin səfiri ilə kifayət qədər açıq söhbət etdi. Ona ölkəsinin yürütdüyü qərəzli və qeyri-adekvat siyasətlə bağlı iradlarını bildirdi. Dövlət başçısının yunan səfirlə söhbətində qardaş Türkiyə ilə bağlı səsləndirdiyi fikirləri isə tarixə damğa vuran ifadələr kimi qiymətləndirirəm.
Ölkə başçısı Azərbaycanla Türkiyənin qardaş ölkələr olduğunu təkcə yunan səfirə deyil, bütövlükdə hər kəsə bəyan etdi. Bu, sıradan çıxış deyildi və tarixdə böyük qətiyyət və siyasi iradə nümunəsi və nümayişi kimi qalacaq. Bir-birinə qardaş deyən ölkələrin liderləri həlledici məqamlarda məhz bu cür prinsipial mövqe sərgiləməli və qardaş ölkələri müdafiə etməlidirlər. Təkcə Azərbaycanla Türkiyə deyil, digər türk cümhuriyyətləri də həm Türkiyə və Azərbaycanı, həm də bir-birilərini bax bu cür dəstəkləməlidir”.
Ə.Hüseynov təəssüflə qeyd edib ki, Orta Asiyanın türkdilli respublikaları (Qazaxıstanı çıxmaq şərtilə) indiyə qədər nə Qarabağ məsələsində, nə də Ermənistanın qondarma “soyqırımı” ittihamına qarşı mübarizədə Azərbaycan və Türkiyəyə dəstək verməyiblər:
“İndi birlik, həmrəylik zamanıdır. Türk Şurasına daxil olan ölkələrin hər biri lazımi anlarda iradə və cəsarət nümayiş etdirməli, həm siyasi, həm də mənəvi dəstək verməlidirlər. Ölkə başçısı İlham Əliyev öz çıxışı ilə bir daha bu dəstəyin real nümunəsini ortaya qoydu. Türkiyə Xarici İşlər naziri Mövlud Çavuşoğlunun bununla bağlı Azərbaycan Prezidenti İlham Əliyevə təşəkkür etməsi də səmimi türklük duyğusundan doğan bir addım oldu.
Çavuşoğlu ilə bərabər, biz də cənab Prezidentimizə bu möhtəşəm çıxışına və qətiyyətli mövqeyinə görə təşəkkür edirik. Dövlət başçısının səsləndirdiyi fikirlər qardaşlığın və həmrəyliyin təntənəsi idi”.
