“Bəzi hallarda bir sıra ölkələr arasında imzalanan sülh sazişi yalnız kağız üzərində qalır, lakin Cənubi Qafqazla bağlı vəziyyət fərqlidir. Bizdə əsl sülh hökm sürür. Ermənistanla Azərbaycan arasında hərbi toqquşmalar və ya eskalasiya artıq gündəlikdə deyil”.
APA xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniyanın “Berliner Zeitung” nəşrinə müsahibəsində bildirib.
Bununla belə, o hər iki ölkənin müəyyən məsələlərdəki fikirlərində fərqliliklərin olduğunu diqqətə çatdırıb:
“Bəzi fikir ayrılıqları hələ də mövcuddur, lakin bu tamamilə normaldır. Diplomatiya və dialoq məhz bunun üçün lazımdır”.
Hikmət Hacıyev tərəflər arasında sülh razılaşmasının mətni ilə bağlı əhəmiyyətli dərəcədə razılığın mövcud olduğunu da diqqətə çatdırıb. Bununla yanaşı, o, Ermənistanın Konstitusiyasında Azərbaycana qarşı mövcud olan ərazi iddialarına da toxunub:
“Biz sülhə və bütövlükdə regionun çiçəklənməsinə hazırıq. Bu, artıq çox müsbət bir haldır. Rəsmi Bakı tərəfindən hazırlanan və Ermənistan tərəfinə təqdim olunan sülh razılaşmasının mətni əhəmiyyətli dərəcədə razılaşdırılıb. Lakin dəqiqləşdirilməsinə ehtiyac duyulan bəzi məsələlər var. Ermənistan Respublikasının Konstitusiyasında Azərbaycana qarşı ərazi iddiaları mövcuddur. İstənilən Konstitusiya o zaman bir ölkənin daxili işi olur ki, orada digər bir dövlətin və ya onun konkret bir regionunun adı çəkilmir”.
Prezident köməkçisi həmçinin, Azərbaycanın erməni xalqının Konstitusiyaya dəyişiklik vasitəsilə bütün ərazi iddialarına son qoymasını istədiyini bildirib:
“Biz sülh razılaşmasını təkcə Ermənistan hökuməti ilə deyil, erməni xalqı ilə də imzalamaq istəyirik. İstəyirik ki, erməni xalqı Konstitusiyaya müvafiq dəyişikliklər vasitəsilə Azərbaycana qarşı bütün ərazi iddialarına son qoysun. Bu addımın atılmasından sonra sülhə gedən yolda qarşımızda heç bir maneə olmayacaq”.
Hikmət Hacıyev ATƏT-in Minsk qrupunun ləğv edilməsini zəruri sayıb:
“ATƏT-in Minsk qrupu tarixin arxivinə göndərilməlidir. Bu, diplomatik fiasko və tam bir iflas idi. 30 il ərazində Minsk qrupu bu uğursuz missiyanı münaqişənin həlli üçün hər hansı bir real perspektiv olmadan həyata keçirib. Biz sülhə çox yaxınıq, hər halda ərazilərimizdə sülh mövcuddur”.
