Yeni dünya düzəni uğrunda dünya ölkələri arasında gərginlik hökm sürür. Faktiki olaraq üçüncü dünya müharibəsinin başlandığına dair siqnallar verilir. Hadisələr Azərbaycanın Şimal va Cənub qonşularının iştirakı ilə baş verir. Dünyanın bölünməsi və yeni xətlərin cızılması prosesi davam edir. Hazırda Cənubi Qafqazın da döyüş arenasına çevrilməsi planlarının işə salındığı görünür. Bu məsələdə Ermənistandan alət kimi istifadə edilir.
Qeyd edək ki, aprelin 5-də Ermənistanda baş nazir Nikol Paşinyan, Avropa Komissiyasının Prezidenti Ursula Fon der Lyayen, ABŞ Dövlət katibi Entoni Blinken arasında üçtərəfli görüş keçirilib. Azərbaycan və Rusiya görüşlə bağlı rəsmi mövqeyini açıqlayaraq bunu pislədi. Bir sözlə, Azərbaycan regionda həyata keçirilməsinə cəhd olunan planlara qarşı qəti mövqe bildirib və buna qarşı çıxır.
Geosiyasi gərginlik fonunda İran tərəfi proses barədə səssizliyini qoruyur.
Maraqlıdır, belə bir şəraitdə İranın susqunluğu nəyə işarətdir? Məsələni dəyərləndirən Sosial Tədqiqatlar Mərkəzinin baş məsləhətçisi, politoloq Tural İsmayılov "Sherg.az"a bildirib ki, faktiki olaraq hər sahədə 3-cü Dünya müharibəsinin ehtimallarını və risklərini müşahidə edirik:
"Azərbaycanın Şimal qonşusu Rusiyanın Ukrayna cəbhəsində müharibəsi, Cənubdan İranın İsrail və digər qüvvələrlə qarşıdurması bölgəyə yaxın güclərin ciddi hərbi-siyasi konfliktlərə cəlb olunmasına səbəb olur. Bunun qarşılığında Azərbaycan "təhlükəsizlik adası" olaraq ictimai-siyasi sabitliyin, dövlət birliyinin yüksək dəyərlərə malik olduğu ölkəyə çevrilib. Dünyada baş verən qarışıqlıqlar, müharibə ocaqlarının böyüməsi bizdən dövlət, xalq birliyinin vacibliyə olan inamını gücləndirməyi tələb edir. Hesab edirəm ki, cəmiyyətimiz gedən təhlükəli oyunları, tendensiyanı başa düşür. Xüsusilə, 5 aprel görüşündə Qərbin Ermənistanı dəstəkləməsi və Brüsseldən İrəvan vasitəsilə Cənubi Qafqazda yeni oyuna başlama cəhdlərinə qarşı Türkiyə, Rusiya, Azərbaycanın kəskin etirazı və İranın isə səssizliyi regiondakı geosiyasətin mürəkkəb və çətin olduğunu söyləməyə əsas verir. Belə gərgin anlarda dövlət-xalq vəhdətinin labüdlüyü ortaya çıxır".
