Regiondakı hərbi təlimlər Ermənistanın izolyasiyasını gücləndirəcək
“Cənubi Qafqazda geosiyasi situasiya yeni mərhələyə keçib. Burada Türkiyə, ABŞ və Rusiyanın maraqlarının toqquşması fonunda Rusiya nüfuzunu itirməkdədir”.
Bu sözləri “Şərq”ə Cənubi Qafqaz Sülh və Münaqişələrin Həlli Mərkəzinin rəhbəri Məhəmməd Əsədullazadə deyib. Politoloq bildirib ki, Ermənistanın Tovuz təxribatlarından sonra Türkiyənin regiona gəlişi və Azərbaycanla birgə hərbi təlimlər keçirməsi türk ordusunun Azərbycanda qalmasına şərait yaradıb:
“Bu, geosiyasi nisbətdə NATO-nun regionda olması deməkdir. Çünki Türkiyə NATO ölkəsidir. Amerika Gürcüstanda aktiv siyasi-hərbi hərəkətliliyini artırmaqla, bir növ NATO-nun burada fəaliyyətinin başlanmasına gətirdi.
Analoji hal Türkiyənin Azərbaycanla hərbi-siyasi konfiqrusiyasıdır. Rəsmi Bakı Ankara ilə siyasətini davam etdirərsə, ölkəmizin suverenliyi və təhlükəsizliyi daha da güclənəcək.
Amerika və digər Qərb ölkələrinin birbaşa Azərbaycanla hərbi təlimləri Rusiya baxımından riskli ola bilərdi. Amma Tükiyənin burada fəaliyyəti etnik baxımından Rusiyanı çəkindirən əsas faktordur. Moskva anlayır ki, Türkiyənin Azərbaycana dəstəyi təbiidir və qardaşlıq yardımıdır”.
Analitik vurğulayıb ki, Cənubi Qafqazda Türkiyə-Azərbaycan, Gürcüstan-ABŞ hərbi əməkdaşlığı regionda Ermənistanın izolyasiyasını gücləndirəcək:
“Ermənistanda inqilabın baş verməsinə baxmayaraq, forpost olaraq daha dərin iqtisadi-siyasi problemlərə yuvarlanacaq. Erməni hakimiyyəti işğalçı mahiyyətinə görə Moskvanın yanındadır.
Bu da imkan verəcək ki, Vaşinqton və Qərb ölkələri Ermənistana yardım etməsinlər. İşğalçı ölkə Tovuz tərəfdən yenidən Azərbaycanın neft və nəqliyyat layihələrini hədəfə ala bilər.
Belə həmlə olarsa, Türkiyə hərbi əməliyyatlara başlaya bilər. Hazırda regionda Türkiyə-Azərbaycan hərbi təlimləri davam edir. Digər tərəfdən ABŞ-ın moderatorluğu ilə Gürcüstanda “Layiqli Tərəfdaş 2020” hərbi təlimləri, həmçinin Rusiyanın Şimali Qafqazda və Ermənistanda birgə hərbi təlimləri keçirilir. Hərbi təlimlərin hamısı tərəflərin bir-birinə əzələ nümayişidir.
Proseslər belə davam edərsə, regionda yeni müharibə qaçılmaz olacaq. Vəziyyət olduqca mürrəkkəbdir. Ona görə də Türkiyə ilə birgə hərbi koordinasiyanı inkşaf etdirməliyik”.
