Bu səhər Ermənistanın Azərbaycana qarşı başlatdığı yeni təxribat xarakterli hücumu şiddətlə qınayıram. Lakin Ermənistan bu dəfə atəşlə oynadığını gec başa düşdü. O atəş bu dəfə Ermənistanı yandıracaq. Azərbaycanın bu hücumlara qarşılıq verərək uzun illər işğal altındakı kəndləri və təpələri azad etməsi münasibətilə də Azərbaycan Ordusunu və xalqını təbrik edirəm.
Bu fikirləri AZƏRTAC-a açıqlamasında Türkiyə Beynəlxalq Münasibətlər və Strateji Araşdırmalar Mərkəzinin (TÜRKSAM) sədri Sinan Oğan bildirib.
O deyib: “Ermənistanın Tovuz bölgəsinə hücumları zamanı neft və təbii qaz xətlərini hədəf alan bir strateji tətbiq etməsi onu göstərir ki, bu yalnız onların özlərinə aid olan bir plan deyil. Bununla Ermənistan və onu dəstəkləyən ölkələr Azərbaycan qazının və enerji qaynaqlarının Avropa və dünyaya çıxmasına mane olmaq istəyirlər. Digər tərəfdən isə Azərbaycanla Türkiyə arasındakı dostluq və qardaşıq əlaqələrinin hərbi əməkdaşlığa çevrilməsinin bölgədəki bəzi dövlətlərin narahatlığına səbəb olduğunu da görürük. Bu narahatlıq Azərbaycana qarşı hücumlara çevrilir. Lakin Türkiyə ilə Azərbaycan arasındakı sağlam dostluq və qardaşlıq münasibətlərindən kim narahat olursa-olsun, Türkiyə istər hərbi, istəsə də diplomatik olmaqla hər sahədə və hər şəraitdə qardaş ölkəni dəstəkləməyə davam edəcək və sonuna qədər Azərbaycanın yanında olacaq.
Ermənistan son zamanlar Suriya və Livan ermənilərini işğal altındakı Azərbaycan torpaqlarına yerləşdirmə siyasəti aparır. Yerləşdirilən bu insanlar arasında PKK terror təşkilatının üzvləri də var. Bununla Ermənistan PKK-nın Türkiyə ordusuna qarşı hücumlarını Azərbaycan ordusuna qarşı da yürütmək niyyətində olduğu görünür. Çünki Ermənistanın Azərbaycanla təkbətək savaşda heç bir şansı olmadığı hər kəsə bəllidir. Tam əminliklə deyə bilərəm ki, Azərbaycan bu müharibədə qalib tərəf olacaq. Belə ki, istər əhali sayı, istərsə də ordu gücü baxımından Ermənistanla Azərbaycan arasında müqayisə olunmayacaq dərəcədə fərq var”.
S.Oğan bildirib: “Azərbaycan Prezidenti İlham Əliyev bir neçə gün əvvəlki çıxışında Azərbaycanın kəşfiyyat orqanları tərəfindən Ermənistanın hücuma hazırlanması barədə xəbərdarlıq edildiyi və buna qarşı tədbirlərin alındığı barədə bildirmişdi. Hazırda biz Azərbaycan ordusunun döyüşə tam hazır olduğunu görürük. Burada birlik də çox vacibdir ki, biz də bunu Azərbaycan xalqının hər bir üzvündə görürük. Müharibə sadəcə cəbhədə deyil, arxa cəbhədə də birlik olduğu təqdirdə qazanılır. Burada Türkiyə və Azərbaycan diasporlarının xaricdəki fəaliyyəti də çox vacib rol oynayır. Hazırda Türkiyə ordusu Azərbaycanın yanındadır, türk siyasətçilər olaraq biz də hər zaman Azərbaycanın yanındayıq”.
