ABŞ Mərkəzi Komandanlığına (CENTCOM) bağlı qüvvələr Suriyada hərbi əməliyyat keçirib. CENTCOM özü yaydığı məlumatda bildirib ki, bu gün səhər saatlarında Fərat Hərbi Dəstək Bölgəsi ətrafında ABŞ və koalisiya qüvvələrinə təhlükə yaradan 3 pikap maşınına quraşdırılmış raket buraxan qurğu, 1 ədəd T-64 tankı, 1 ədəd PDM və minatan da daxil olmaqla, müxtəlif silah sistemlərini uğurla məhv edib.Onlar həmçinin əlavə edib ki, sözügedən əməliyyatın Suriyanın şimal-qərbində baş verən son hadisələrlə heç bir əlaqəsi yoxdur:
“Buna baxmayaraq, regionda baş verən son prosesləri yaxından izləməyə davam edirik”.
CENTCOM-un Suriyadakı hərbi əməliyyatını "Sherg.az"a şərh edən politoloq Tural İsmayılov bildirib ki, ABŞ-nin Suriyada həyata keçirdiyi siyasət böhrana və ictimai gərginliyə səbəb olub:
"Ağ Ev, Suriyadakı maraqlarını təmin etmək məqsədilə PYD və YPG kimi qruplaşmaları dəstəkləməyi seçib. Bu dəstək, NATO-ya üzv olan və regionda mühüm geosiyasi rola malik Türkiyəyə qarşı ciddi haqsızlıq kimi qəbul olunur. Çünki PYD və YPG qruplaşmaları uzun illərdir Türkiyəyə qarşı separatçı fəaliyyətlər həyata keçirir və ölkənin ərazi bütövlüyünü təhdid edir. Bu cür dəstək, yalnız Türkiyənin deyil, bütövlükdə regionun sabitliyinə mənfi təsir göstərir.
Eyni zamanda, CENTCOM-un bölgədə həyata keçirdiyi hərbi əməliyyatlar da ABŞ-nin maraqlarını təmin etmək məqsədinə xidmət edir. ABŞ-nin Əsəd qüvvələrinə qarşı təşkil etdiyi əməliyyatlar, ilk baxışda demokratiya və sabitlik gətirmək niyyəti kimi təqdim olunsa da, əslində, imperialist maraqların irəlilədilməsinə yönəlib. Bu siyasət, yalnız Suriyada deyil, ümumilikdə Yaxın Şərqdə uzunmüddətli sabitliyə təhlükə yaradır və mövcud gərginlikləri daha da dərinləşdirir.
Ekspert əlavə edib ki, Bayden administrasiyasının hakimiyyətinin son günlərində ABŞ, Yaxın Şərqdə və digər regionlarda hərbi dağıdıcılıq siyasətini davam etdirə bilər.
"Bu, artıq təhlükəli bir tendensiyaya çevrilib və qlobal sabitlik üçün ciddi təhdid yaradır".
