Rusiya ilə Ukrayna arasında vasitəçi olmaq üçün Türkiyə kimi güclü olmaq şərtdir.
Bunu Ukraynanın Türkiyədəki səfiri Vasili Bodnar deyib.
O, Türkiyəni digər vasitəçilik iddiasında olan dövlətlərə nümunə göstərib:
“Prezident Rəcəb Tayyib Ərdoğan və xarici işlər naziri Hakan Fidan davam edən bu müharibəyə son qoymaq üçün çox səy göstərdilər, vaxt sərf etdilər. Əldə olunan və dünya miqyasında uğurlu olan “Taxıl sazişi” həm də Türkiyənin uğurudur. Türkiyə əsir mübadiləsində də uğurlu olmuşdu. Türkiyə dünyada liderdir”.
Vasili Bodnarın fikirlərinə münasibət bildirən “Report" İA-nın əməkdaşı Kənan Novruzov “Sherg.az”a söyləyib ki, Türkiyə Ukrayna müharibəsinin ilk günlərindən savaşın başa çatması üçün səmimi səylər göstərir:
“Həmin səylər isə nə Ukraynaya, nə də Rusiyaya görədir. Türkiyənin hər iki dövlətlə normal münasibətləri var və bu əlaqələrin qorunmasına çalışır. Sözügedən münasibətlərin qorunması Türkiyənin Şərqi Avropa regionunda təsir gücünün artması deməkdir. Amma müharibə davam etdikcə, Türkiyə daha da çətin vəziyyətə düşür və tərəf seçməli olur. Proseslər böyüyərək faktiki olaraq NATO və Rusiya müharibəsinə doğru gedir. Belə olan halda isə Türkiyə NATO və Rusiya arasında seçim etmək məcburiyyətində qalacaq. Ona görə də rəsmi Ankara mümkün qədər prosesin qarşısını almağa cəhd edir. Digər tərəfdən isə Türkiyə Amerika Birləşmiş Ştatlarının oynunu Ukraynada pozmağa çalışır. Türkiyənin bu təşəbbüsləri həm Moskvanın, həm də Kiyevin xeyrinədir. Bundan sonra Türkiyə ABŞ və Avropa ilə müəyyən mövqe ortaya qoymaları üçün danışmalıdır. Təəssüf ki, bu gün Fransa və ABŞ kimi digər dövlətlər Şərqi Avropada “alova benzin tökürlər”. Səfirin mesajlarında isə ciddi həqiqətlər var. Eyni zamanda səfirin çıxışı bir növ ABŞ və Fransaya mesajdır. Yəni sizin edə bilmədiynizi rəsmi Ankara həyata keçirdi və Türkiyə sizdən daha güclüdür”.
Qeyd edək ki, Rusiya ilə Ukrayna arasında müharibə 2022-ci il fevralın 24-də başlayıb. Müharibənin ilk günündən etibarən Türkiyə vasitəçilik səylərini davam etdirir. Rəsmi Ankaranın vasitəçiliyi ilə indiyədək tərəflər arasında əsir mübadiləsi həyata keçirilib, "Taxıl sazişi" imzalanıb.
