Türk Dövlətləri Təşkilatının mülki müdafiə mexanizmi təsis ediləcək. Bu, Milli Məclisin bu gün keçirilən iclasında müzakirəyə çıxarılan “Türk Dövlətləri Təşkilatının mülki müdafiə mexanizminin təsis edilməsi haqqında Saziş”in təsdiq edilməsi barədə” qanun layihəsində əksini tapıb. Parlamentin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev bildirib ki, “Türk Dövlətləri Təşkilatının mülki müdafiə mexanizminin təsis edilməsi haqqında Saziş” Azərbaycan, Qazaxıstan, Qırğızıstan, Türkiyə və Özbəkistan Hökumətlərinin təmsilçiləri tərəfindən 06 noyabr 2024-cü il tarixində Bişkek şəhərində imzalanıb: “Türk Dövlətləri Təşkilatının Mülki Müdafiə Mexanizminin məqsədi Türk Dövlətləri Təşkilatına üzv və müşahidəçi dövlətlərin, eləcə də digər dövlətlərin ərazilərində baş verə biləcək fəlakətlər və fövqəladə hallar zamanı fövqəladə ehtiyacları dəstəkləmək üçün fəlakətlərə cavab tədbirləri üzrə ortaq potensialın yaradılmasıdır. Sazişin həyata keçirilməsinə məsul olan səlahiyyətli qurumlar kimi Azərbaycan, Qazaxıstan, Qırğızıstan və Özbəkistan dövlətləri tərəfindən həmin dövlətlərin Fövqəladə Hallar Nazirlikləri, Türkiyə Respublikası tərəfindən isə Daxili İşlər Nazirliyi müəyyən edilib. Sazişə əsasən, Tərəflər Türk Dövlətləri Təşkilatının Mülki Müdafiə Mexanizmini hüquqi şəxs statusuna malik olan beynəlxalq təşkilat formasında təsis edirlər. Mexanizmin inzibati strukturlarına fəlakət və fövqəladə halların idarə edilməsinə məsul olan Nazirlər Şurası və Katibliyi aid edilir. Nazirlər Şurasının tərkibi tərəflərin fəlakət və fövqəladə halların idarə edilməsinə məsul nazirlərindən ibarət olur. TDT-yə sədrlik edən tərəfi təmsil edən nazir həm də Şuraya sədrlik edir. TDTMMM-in Katibliyi isə məqsəd və vəzifələrin icrasına, iş fəaliyyətinin həyata keçirilməsinə və əlaqələndirilməsinə yardım göstərir. Katibliyə tərəflərin rəsmi adlarının ingilis əlifbası sırasına uyğun olaraq rotasiya əsasında Nazirlər Şurası tərəfindən təyin edilən Baş katib rəhbərlik edir. Baş katibin səlahiyyət müddəti üç ildir və bu müddət maksimum iki il uzadıla bilər. Katibliyin qərargahı isə İstanbul şəhərində yerləşir”.
Türkiyənin Azərbaycandakı keçmiş hərbi attaşesi, ehtiyatda olan general Yücel Karauz Sherg.az-a bildirib ki, bu mövzuda geniş əməkdaşlığa başlanılıb:
“2024-cü ilin noyabr ayında keçirilən toplantıda Türk Dövlətləri Təşkilatının mülki müdafiə sisteminin qurulması, bunun çərçivəsində müasir dövrün yarana biləcək təhdidləri – sel, yanğın, zəlzələ, ictimai qarışıqlıqlar kimi hallara müdaxilə ilə bağlı Türkiyədə Daxili İşlər Nazirliyinin (DİN) və digər ölkələrdə Fövqəladə Hallar Nazirliyinin (FHN) iştirak etdiyi aktiv bir təşkilat sistemi qurulub. Şuranın sədri isə Türk Dövlətləri Təşkilatına sədrlik edən ölkənin müvafiq naziri olacaq şəkildə müəyyənləşdirilib. Bu, çox uğurlu bir addım və fəaliyyətdir. Həm ortaq məqsəd və hədəf üçün birgə çalışma, həm də yaxşı və pis gündə də bir araya gələ bilmək baxımından bunun avtomatik bir mexanizmə çevrilməsi önəmlidir. Eyni zamanda, ümumi mənada təhlükəsizlik siyasətləri və tətbiqləri baxımından da bir irəliləyiş deməkdir. Bu baxımdan mən Türk Dövlətləri Təşkilatına üzv dövlətlərin mülkü müdafiə mövzularında, xüsusilə də hibrid müharibənin yaratdığı yeni təhdidlər nəzərə alınmaqla əməkdaşlıq etməsini, koordinasiyalı şəkildə fəaliyyət göstərməsini, zəruri təlimlərin və qərargah işlərinin həyata keçirilməsini mühüm bir mərhələ olaraq qiymətləndirirəm”.
