İsveçin Kiruna bələdiyyəsində yerləşən Abisku Milli Parkında faciəli hadisə baş verib: turistlərin olduğu helikopter qar uçqunu altında qalıb.
AZƏRTAC xəbər verir ki, hadisə nəticəsində 7 nəfər zərər çəkib, İtaliya vətəndaşları olan iki nəfər həlak olub.
Polis ehtiyatsızlıqdan ölümə və bədənə xəsarət yetirmə hadisələri ilə bağlı ilkin araşdırmalara başlayıb. Şübhəli şəxslərlə yanaşı, tur təşkil edən turizm şirkəti də araşdırmaya cəlb olunub.
Bundan əvvəl İsveçin “Naturvardsverket” Təbiəti Mühafizə Agentliyi ərazidə yüksək uçqun təhlükəsi ilə bağlı xəbərdarlıq etmişdi. Faciədən cəmi bir gün əvvəl Abisku və Riksqrensen ətrafında altı qar uçqunu qeydə alınıb.
Ekspertlər vurğulayırlar ki, qar örtüyü son dərəcə qeyri-sabit olaraq qalır. Hətta bir qrup xizəkçinin və ya tək qar arabasının hərəkəti kimi minimal yük də qar uçqununa səbəb ola bilər.
Turistlərə yamac bucağını və yığılmış qarın həcmini diqqətlə izləmək, ən kiçik bir şübhə olduqda isə hava şəraiti sabitləşənə qədər səfəri təxirə salmaq tövsiyə olunur.
