“Ermənistan KTMT qarşısında götürdüyü öhdəlikləri nümayişkaranə şəkildə yerinə yetirmir”.
Teleqraf xəbər verir ki, bunu Rusiya Dövlət Dumasının deputatı Konstantin Zatulin deyib.
Siyasətçi bildirib ki, Ermənistan Qərbə yönəlsə də, Rusiya ilə iqtisadi əlaqələrdən faydalanmaqda davam edir:
“Məncə, üzvlük haqlarının ödənilməməsi Ermənistanın KTMT-də real iştirakını müzakirə etmək üçün ən mühüm səbəb deyil. Görünən odur ki, onlar KTMT çərçivəsində əməkdaşlığı dayandırdıqları üçün nümayişkaranə şəkildə üzvlük haqlarını ödəmirlər, həmçinin Avrasiya İqtisadi Birliyində qalmaqda davam edirlər. Üstəlik, sübut etməyə çalışırlar ki, eyni anda Rusiya ilə hərbi-siyasi əməkdaşlıqdan çıxaraq Qərbə istiqamətlənmək, Rusiya, KTMT və Avrasiya İqtisadi Birliyinin digər ölkələri ilə iqtisadi əlaqələrdən və iqtisadi inkişafdan faydalanmaq olar”.
Zatulin əlavə edib ki, Ermənistanın taleyi və istiqaməti gələn il keçiriləcək seçkilərdə müəyyənləşəcək:
“Əlbəttə, Ermənistanın hara getməsi ilə bağlı söhbət getdikcə qızışır. Bu söhbət dərin köklərə malikdir və Ermənistanın taleyi və onun xarici siyasət istiqamətini yalnız gələn il keçiriləcək seçkilərin nəticələri müəyyən edəcək”.
