Hərbi təlimlər siyasi mesajdır
Özbəkistanda keçirilən "Birlik - 2025" adlı birgə hərbi təlim yekunlaşıb. Təlimdə Azərbaycan, Qazaxıstan, Tacikistan, Qırğızıstan və Özbəkistan respublikalarından komando və PUA heyətləri iştirak ediblər. Birgə regional təlimin məqsədi iştirakçı ölkələrin hərbi qulluqçularının antiterror əməliyyatlarında peşəkarlıqlarının daha da artırılması, regionda dayanıqlı sülhün qorunması və qarşılıqlı təcrübə mübadiləsinin aparılmasıdır.
Müharibə, Əmək və Silahlı Qüvvələr Veteranları Təşkilatının sədr müavini, hərbi-siyasi ekspert, polkovnik Cəlil Xəlilov Sherg.az-a deyib ki, türk dövlətləri arasında hərbi təlimlərin keçirilməsi həm hərbi, həm də siyasi baxımdan mühüm əhəmiyyətə malikdir. Hərbi ekspert vurğulayıb ki, istənilən hərbi əməkdaşlıq eyni zamanda siyasi mahiyyət kəsb edir:
"Bu gün dünyanın ən böyük və güclü hərbi alyansı olan NATO hərbi-siyasi blok kimi xarakterizə olunur. Bu baxımdan Səmərqənd vilayətində Azərbaycan, Qazaxıstan, Qırğızıstan, Özbəkistan və Tacikistan hərbçilərinin iştirakı ilə "Birlik-2025" birgə təlimin keçirilməsi önəm kəsb edir. Bu təlim hər şeydən öncə türk dövlətlərinin öz təhlükəsizliklərini bir yerdə gördüklərini, hər cür təhdidə qarşı birgə mübarizə aparmağa hazır olduqlarını göstərir. Digər yandan, birgə təlimlər mesaj verir ki, türk dövlətləri qlobal siyasi arenada baş verən dəyişiklikləri diqqətlə izləyir, bu dəyişikliklərin əsl mahiyyətini aydın şəkildə başa düşür, buna adekvat reaksiya verirlər. Müasir dünyamızda gücün beynəlxalq qanunvericiliyi üstələdiyi, bütün hadisə və proseslərə açıq şəkildə diktə etdiyi heç kimə sirr deyil. Kim daha güclüdürsə, öz təhlükəsizliyini təmin edə bilir. Belə olan halda türk dövlətlərinin öz hərbi imkanlarını artırması, birgə hərbi təlimlər fonunda inkişaf etdirməsi təqdirəlayiqdir".
Polkovnik bəyan edib ki, "Birlik-2025" birgə təlimləri türk dünyasının hərbi-siyasi birliyi istiqamətində atılan mühüm addım hesab edilə bilər:
"Prezident İlham Əliyev bir müddət öncə türk dövlətləri arasında birgə hərbi təlimlərin keçirilməsini təklif etmişdi. Səmərqənd vilayətindəki təlimlər, əslində, bu istiqamətdə atılan ilk irimiqyaslı addım sayıla bilər. Türk dövlətləri arasındakı hərbi əməkdaşlıq mahiyyətcə yeni mərhələyə qədəm qoymaqdadır. Türk dünyasının hərbi-siyasi müstəvidə öz fəaliyyətini koordinasiya etməsi, beynəlxalq platformalarda vahid güc mərkəzi kimi çıxış etməsi hər bir türk dövlətinə öz təhlükəsizliyini uğurla təmin etməyə, qlobal münasibətlər sistemində layiqli yer tutmağa imkan verəcək".
