Bu gün ünvanlı sosial yardımın orta məbləği təxminən 450 manatdır. APA xəbər verir ki, bunu DOST TV-nin canlı yayımında əmək və əhalinin sosial müdafiəsi naziri Sahil Babayev deyib. Nazir deyib ki, ünvanlı sosial yardımla bağlı qaydalar sadələşdirilib. “Nəzərə almalıyıq ki, ünvanlı sosial yardım passiv alətdir. Lakin tələb əhalini aktiv əlatlərlə təmin etməkdir”- deyə o qeyd edib.
Nazir vətəndaşlara çağırış edərək bildirib ki, ünvanlı sosial yardımın düzəldilməsi tamamilə elektron qaydada həyata keçirilir, buna görə kimlərinsə onlara yardım adı ilə aldatmasına imkan verməsinlər.
Məsələ ilə bağlı danışan "Sherg.az"a danışan iqtisadçı ekspert Xalid Kərimli bildirib ki, elektronlaşma faydalı prossesdir və şəffaflığın artmasına gətirib çıxarır:
"Sosial yardımın verilməsinin elektronlaşdırılması insanların obyektiv qiymətləndirilməsinə, sənədlərin verilməsində artıq xərclərin yaranmamasına, dəllalların ortadan çıxmasına səbəb olur. Ancaq sosial yardımı elə müəyyənləşdiriblər ki, əlçatanlığı azdır. Ünvanlı sosial yardımın ehtiyacı olan ailələrə çatdırılması üçün şərtlər yumşaldılmalıdır. Məsələn, bir şəxsin 70-ci illərdə mülkiyyətində maşını varsa, sosial yardım verilmir. Heç olmasa, bu şərt yeni avtomobil sahibləri üçün keçərli olsun. Bu cür kəskin məsələlər yardımın çox ailəyə verilməsinin qarşısını alır. Ünvanlı sosial yardım isə ehtiyac meyarına görə hesablanır. Ölkəmizdə 2024-cü il üçün ehtiyac meyarı olaraq 270 manat təsdiq olunub. Belə ki, ailənin gəlirləri toplanaraq ailə üzvlərinin ehtiyacı çıxılır. 270 manatın bir insanın dolanışığı üçün yetərli olub-olmamasını müzakirə etmək olar. Qeyd edilən 450 manat isə ehtiyac meyarı ilə müəyyənləşən rəqəmdir. İndiki şərtlər daxilində bu statistika real görsənmir. Lakin Nazirlər Kabinetinin metodologiyası əsaslanan göstəricidir".
