Qadınların yaşca böyük kişilərlə münasibət qurmaq meyli təkcə maddi amillərlə izah oluna bilməz
Qadın artıq münasibətdə “baxılan” yox, seçən tərəf kimi çıxış edir
Daha yaşlı kişilər üçün də gənc qadınlarla münasibət özlərinə bir növ “təkrar gənclik”, həyat enerjisi və yenilənmə hissi gətirə bilir
Son vaxtlar qadınların özlərindən yaşca xeyli böyük kişilərlə münasibət qurmağa marağının artması cəmiyyətin diqqətini cəlb edən sosial mövzulardan birinə çevrilib. Bu tendensiya təkcə şəxsi seçimlərlə deyil, həm də müxtəlif psixoloji, emosional və sosial amillərlə bağlıdır. Bəziləri bunu kişilərin həyat təcrübəsi və sabitlik arzusu ilə əlaqələndirir. Digər tərəfdən, bu mövzu ətrafında cəmiyyətdə fərqli baxışlar və müzakirələr formalaşır.
Məsələ ilə bağlı “Sherg.az”a danışan psixoloq Zeynəb Əyyubova bildirib ki, cəmiyyətin psixososial dinamikalarında baş verən dəyişiklikləri anlamaq olduqca vacibdir:
“İlk növbədə vurğulamaq lazımdır ki, insanların münasibət seçimlərini müəyyən edən faktorlar çoxşaxəlidir, bunlar yalnız maddi və ya yaş fərqlərinə əsaslanmır. Qadınların özlərindən yaşca böyük kişilərlə münasibət qurmağa meyilli olması müxtəlif psixoloji, emosional və sosial səbəblərlə əlaqəlidir. Yaşlı kişilər çox zaman emosional baxımdan daha sabit, həyat təcrübəsi olan və münasibətə qarşı daha məsuliyyətli yanaşan tərəf kimi görünür. Gənc və ya yaşı özlərinə yaxın kişilərlə yaşanmış qeyri-sabit, qeyri-ciddi münasibətlərdən sonra bəzi qadınlar üçün bu cür yetkin bir fiqur güvən və rahatlıq hissi yaradır. Bu, xüsusilə də emosional travma keçirmiş və ya uşaqlıqda ata fiqurundan müəyyən qədər məhrum olmuş qadınlarda daha çox müşahidə oluna bilər. Şübhəsiz ki, bəzi hallarda maddi faktorlar da bu tip münasibətlərdə rol oynayır. Daha yaşlı kişilərin artıq karyerada müəyyən mərhələyə çatdıqları, maliyyə baxımından daha sabit olduqları üçün bu münasibət bir növ “təhlükəsizlik zonası” kimi dəyərləndirilə bilər. Lakin burada sadəcə pul və imkan məsələsi deyil, ümumi həyat şəraiti, həyat keyfiyyəti, təcrübə və rahatlıq axtarışı da nəzərdə tutulur. İnsanlar artıq münasibətlərdə yalnız sevgi və ehtiras deyil, dayanıqlılıq və qarşılıqlı fayda da axtarırlar. Son illərdə qadınların müstəqil qərar vermə gücü artdıqca münasibətlərdəki “ənənəvi rollar” da dəyişməyə başlayıb. Əvvəllər yaş fərqi daha çox cəmiyyətin təpkisi ilə qarşılaşırdısa, bu gün bu münasibətlərə daha açıq və neytral yanaşılır. Qadın artıq münasibətdə “baxılan” yox, seçən tərəf kimi çıxış edir və bu da onun öz ehtiyac və prioritetlərini daha açıq şəkildə ortaya qoymasına şərait yaradır”.
Psixoloqun sözlərinə görə bəzi hallarda qadınların yaşca böyük kişilərə marağı onların psixodinamik inkişafı ilə əlaqələndirilə bilər:
“Yəni, uşaqlıq dövründə yetərincə ata sevgisi, qoruyuculuğu və ya qayğısı görməmiş qadınlar, sonradan bu boşluğu münasibətlərdə kompensasiya etməyə meyilli ola bilərlər. Bu, tamamilə şüuraltı şəkildə baş verən bir prosesdir və qadının özünə belə seçimin səbəbi ilk baxışdan aydın olmaya bilər. Burada qeyd edilməli vacib bir nüans da var, münasibətlərdə yalnız qadın tərəfi deyil, kişi tərəfi də aktiv seçim edir. Daha yaşlı kişilər üçün də gənc qadınlarla münasibət özlərinə bir növ “təkrar gənclik”, həyat enerjisi və yenilənmə hissi gətirə bilir. Bu səbəbdən bu münasibətlər qarşılıqlı ehtiyac və gözləntilərin uyğunlaşması əsasında formalaşır. Qadınların yaşca böyük kişilərlə münasibət qurmaq meyli təkcə maddi amillərlə izah oluna bilməz. Bu, emosional ehtiyaclar, həyat təcrübəsi axtarışı, sabitlik arzusu və psixoloji amillərlə sıx bağlı olan kompleks bir tendensiyadır. Hər bir münasibət fərdi kontekstdə qiymətləndirilməlidir, çünki bu seçimlərin arxasında dayanan səbəblər insandan insana dəyişir”.
