Bakıda ictimai nəqliyyatda kəsici alətlə (bıçaq) qeyri-adekvat hərəkətlər edən qadın saxlanılıb.
Bu barədə DİN-in Mətbuat Xidmətinin əməkdaşı polis leytenantı Lumu İsrəfilli bildirib.
Qeyd olunub ki, Bakıda ictimai nəqliyyatda kəsici alətlə qeyri-adekvat hərəkətlər edən 1957-ci il təvəllüdlü qadın polis əməkdaşları tərəfindən saxlanılıb.
Onun sağlamlıq vəziyyəti nəzərə alınaraq barəsində qanunamüvafiq tədbirlər görülüb.
Məsələ ilə bağlı Sherg.az-a danışan psixoloq Zeynəb Əyyubova bildirib ki, ictimai yerlərdə baş verən qeyri-adekvat davranışların arxasında ciddi psixoloji səbəblər dayanır:
“Bakıda ictimai nəqliyyatda kəsici alətlə qeyri-adekvat hərəkətlər edən qadının saxlanılması bir daha göstərdi ki, psixoloji sağlamlıq məsələsi cəmiyyət üçün nə qədər aktual və vacibdir. Bu kimi hallarda şəxsin psixoloji vəziyyəti hüquqi qiymətləndirməyə birbaşa təsir edir. Əgər şəxs hadisə zamanı adekvat deyilsə, yəni reallıqla əlaqəsini itiribsə, o zaman məhkəmə psixiatriya ekspertizası təyin olunur. Bu ekspertiza şəxsin ruhi vəziyyətini müəyyənləşdirir və nəticədə həmin şəxsin cinayət məsuliyyətinə cəlb olunub-olunmaması qərarlaşdırılır. Yəni hüquqi qiymətləndirmə, təkcə hərəkətin xarakterinə deyil, həm də həmin şəxsin psixoloji durumuna əsasən aparılır”.
Ekspert belə halların artmasının səbəbləri sırasında bir neçə sosial və psixoloji faktorları sadalayıb:
“Bura uzunmüddətli psixoloji gərginlik və emosional yüklənmə, sosial təcrid, dəstək sisteminin zəifliyi, ailə daxilində zorakılıq və ya uşaqlıq travmaları, işsizlik, iqtisadi çətinliklər, sosial ədalətsizlik hissi, mühitdə artan aqressiya və mənəvi boşluq daxildir. Həmçinin stres, sosial təzyiq və keçmişdə yaşanmış psixoloji travmalar insanın psixikasına dərin təsir göstərir. Zamanla bu travmalar basdırılsa da, bir gün kontrolsuz şəkildə özünü göstərə bilər. Xüsusilə qadınlarda uzun illər susqun qalan ağrıların və təzyiqlərin bir nöqtədə bu cür partlayışa çevrilməsi halları mümkündür. Psixoloq olaraq mənim fikrim budur ki, biz psixoloji sağlamlığı fiziki sağlamlıq qədər ciddiyə almalı, insanlar üçün əlçatan və stigma yaratmayan psixoloji dəstək imkanları yaratmalıyıq. Cəmiyyətin psixoloji rifahı, onun sabitliyi və təhlükəsizliyi üçün vacib amildir”.
