Paytaxtın Nərimanov rayonunda azyaşlıya qarşı əxlaqsız hərəkətlər edən şəxs saxlanılıb.
Bu barədə Daxili İşlər Nazirliyinin (DİN) Mətbuat xidmətindən məlumat verilib.
Bildirilib ki, Nərimanov rayonunda yaşayış binalarından birinin girişində azyaşlıya qarşı əxlaqsız hərəkətlərin edilməsi barədə polisə məlumat daxil olub. Nərimanov Rayon Polis İdarəsinin əməkdaşlarının keçirdikləri tədbirlərlə hadisəni törədən Maksim Məmmədov saxlanılıb. Araşdırma zamanı müəyyən edilib ki, o, əvvəlcə azyaşlını izləyib. Daha sonra binanın girişində yaxınlaşaraq ona qarşı əxlaqsız hərəkətlər edib.
Faktla bağlı Cinayət Məcəlləsinin müvafiq maddələri ilə cinayət işi başlanılıb. Nərimanov rayon məhkəməsinin qərarı ilə M.Məmmədov barəsində 3 ay müddətinə həbs qətimkan tədbiri seçilib.
Azərbaycanda bu kimi əməli törədənlərin həbs müddətinin və bundan sonrakı taleyinin çox acınacaqlı olduğunu deyən sosioloq Lalə Mehralı "Sherg.az"a bildirib ki, onlar heç bir halda cəmiyyətə qaynayıb-qarışa bilmirlər:
"Çünki etdikləri heç bir əxlaqi dəyərə sığmır. Bu səbəbdən onların cəmiyyətə adaptasiyası mümkün olmur. Əlavə olaraq həpsxanada cəza vaxtını çox çətin keçirirlər. Bu cür şəxsləri adətən bir kamerada yerləşdirirlər. Çünki onları başqa cinayyətlərə görə, cəzalandırılanlarla bir yerdə qoyduqda təzyiq halları yaranır. Bir sözlə, azyaşlıya qarşı təcavüzkarlıq ən aşağı cinayyət hesab olunur. Bəziləri bu nüansları bilsələr də, nəfsinə yenilərək olmayan əxlaqını unudur. Hadisədə əli olan şəxsin azyaşlını izləyərək əməlini planlı şəkildə həyata keçirməsi cəzasının artmasına səbəb olacaq. Təcavüzə məruz qalan hər bir uşaq bunu gizlətməməli, valideyninə, müəlliminə, güvəndiyi şəxsə deməlidir. Uşaqlar bu kimi hallardan utanıb qorxdularaq kiməsə demədikdə belə hadisələr gizli olaraq da qalır. Hətta, ailə daxilində təcavüzə məruz qalanlar var. Onlar qorxudulur. Nəticədə gələncəkdə həmin uşaqda psixoloji travmalar qalır. Həm bu cür əxlaqdan xəbəri olmayanların, həm də təcavüzə məruz qalanların cəmiyyətimizdə olması çox narahatedici vəziyyətdir. Bu kimi əməllərin qurbanı olanlar qorxub susduqca təcavüzkarlar bundan cəsarətlənirlər. İctimailəşdirilərək adiləşdirilməkdənsə, Hüquq Mühafizə Orqanlarına məlumat verməli və tədbir görülməlidir".
