Tərtərçay çayında su azalıb, balıqlar üzə çıxıb.
Teleqraf-ın Qarabağ bürosunun xəbərinə görə, Tərtərçay çayının Bərdə rayon ərazisindən keçən hissəsində bu gün səhər saatlarında çayda suyun azalması balıqların kütləvi şəkildə susuz qalmasına səbəb olub. Bunu fürsət bilən rayon sakinləri üzə çıxan balıqları rahatlıqla tutmağa başlayıblar.
Qeyd edək ki, bu aylar balıqların kürü töküb bala qoyub nəsil artırmaq vaxtlarıdır. Çayda suyun azalmasının səbəbi nədir?
Azərbaycan Dövlət Su Ehtiyatları Agentliyi Teleqraf-ın sorğusuna cavab olaraq bildirib ki, hazırda Tərtərçayda təmizlik işləri aparılır:
“Bərdədə Heydər Əliyev adına Park Bulvar ərazisindən keçən Tərtərçay üzərində yaradılmış göl uzun müddət su dövriyyəsindən kənarda qaldığından ekoloji çirklənmə baş verib. Bu səbəbdən RİH-nin nəzarəti altında təmizlik və abadlıq işlərinə başlanılıb. İşlər başa çatdıqdan sonra su hövzəsi əvvəlki vəziyyətinə qaytarılacaq”, - qurumdan bildirilib.
